Балаҕын ыйын 18 күнүгэр Ф. Потапов аатынан норуот айымнытын дьиэтигэр В.Г. Короленко аатынан Амма 1 №-дээх орто оскуолатын үөрэнээччилэрэ үгэскэ кубулуйбут күһүҥҥү атыы-эргиэн дьаарбаҥкатын тэрийдилэр. Амма нэһилиэгин олохтоохторо, ыалдьыттара баай-талым, минньигэс астаах-үөлээх тэрээһинтэн олус астынан бардылар.
Дьүүллүүр сүбэҕэ бэрэссэдээтэлинэн Амма 1 №-дээх орто оскуолатыгар агро хайысхатын үлэтин, үөрэнээччилэри идэҕэ уһуйууга уонна оскуолатааҕы биисэнэс-инкубатор салайааччыта Егор Баттахов, чилиэннэринэн Мария Сибирякова уонна Оксана Гаврильева үлэлээтилэр.
Бүгүҥҥү дьаарбаҥкабытыгар барыта 29 кылаас кытынна. Олор истэригэр биисэнэс-инкубатор резиденнэрэ уонна атыылааччы, повар идэтигэр үөрэммит уонна үөрэнэ сылдьар оҕолорбут көхтөөхтүк кытыннылар. Бэйэлэрин астарын таһынан оскуолабыт уһаайбатыгар олордуллубут оҕуруот астарыттан кэнсиэрбэлээн бородууксуйаларын эмиэ атыылаатылар. Түмүккэ кылаан кыайыылаахтарынан кыра кылаастарга 4 “б” кылаас (салайааччы Елена Оконешникова, төрөппүт сүбэтин бэрэссэдээтэлэ Александра Кокарева), орто кылаастарга 7 “в” (салайааччы Яна Чемезова, төрөппүт сүбэтин бэрэссэдээтэлэ Анна Адамова), улахан кылаастарга 10 “а” (салайааччы Ульяна Путренко, төрөппүт сүбэтин бэрэссэдээтэлэ Полина Алексеева) буоллулар.
Бу дьаарбаҥкаттан киирбит үп сороҕото Амма 2 №-дээх орто оскуолатын үөрэнээччитигэр Люба Никитинаҕа көмө быһыытынан барыаҕа. Манна кыттыбыт бары учууталларга уонна куруук көмө буолар төрөппүттэрбитигэр улахан махталбытын тирэрдэбит, — диэн Егор Николаевич санаатын үллэһиннэ.
- Татьяна ПЕТРОВА,
- В.Г. Короленко аатынан Амма 1 №-дээх орто оскуола дириэктэрин сүбэһитэ.