Амма 1 №-дээх орто оскуолатыгар оҕо идэтин таларыгар араас бырайыактар көмөлөрө улахан. Оскуола ааспыт кэмнэргэ «Ирбэт тоҥҥо култууралар алтыһыылара», оттон кэнники сылларга «ALCoB« диэн АТЭС дойдуларын (Азия-Чуумпу акыйаан дойдулара экономикаҕа бииргэ үлэлээһиннэрэ) уопсастыбатыгар киирсэн норуоттар икки ардыларынааҕы араас бырайыактары үлэлэтэрэ элбэх оҕо интэриэһин тардар.
В.Г. Короленко аатынан Амма 1 №-дээх орто оскуолатыгар ааспыт үйэттэн өр сылларга үлэлээн кэлбит «Ирбэт тоҥҥо култууралар алтыһыылара» оҕо аймаҕы омук тылыгар уһуйар бырайыак кэнниттэн иккис тыынын ылбыт «ALCoB» бырайыак сэттис сылын үлэлиир. Бырайыак соруга үөрэнээччилэри аангылыйа тылынан араас тиэмэлэргэ сөпкө саҥаралларыгар, атын норуоттар култуураларын билэллэригэр, араас омуктары кытта доҕордуу буолалларыгар уонна биир сүрүн сыала оҕолор инники олохторугар омук тылын идэ гыналларыгар туһуланар. Оскуола бастакы хардыытынан Соҕуруу Кэриэйэ норуоттарын икки ардыларынааҕы «Роботехника уонна бырагырааманан хааччыйыы» бырайыагынан Соҕуруу Кэриэйэ Бонг Донг куоратын орто оскуолатын оҕолорун кытта онлайн уроктарга араас тиэмэлэргэ омуктуу кэпсэппиттэрэ, учууталлар хардарыта дьарыктары ыыппыттара, оҕолор бэйэ-бэйэлэригэр араас өйдөбүнньүк бэлэхтэри оҥорбуттара.
Оскуола 20 үөрэнээччитэ уонна 2 омук тылын учууталлара Бонг Донг орто оскуолатын ыҥырыытынан тиийэн 10 хонукка сынньанан, дойду култууратын, олоҕун-дьаһаҕын билсэн, робототехника уонна аангылыйа тылын уруоктарыгар сылдьан, астынан кэлбиттэрэ биир умнуллубат түгэн буолбута. Соҕуруу Кэриэйэттэн эмиэ 12 оҕо уонна 3 учуутал кэлэннэр Аммаҕа кэлэн сынньанан, араас уруоктарга, быыстапкаларга сылдьан, дойдубут айылҕата кэрэтин, аспыт минньигэһин, култуурабытын сөҕөн барбыттара.
Бырайыак сайдарыгар оскуола омук тылыгар эдэр учууталлара Валентина Хураганчык, Аюрана Габышева тирэх буолбуттара. Сыл аайы оскуола тас дойдулары кытта сибээстэрэ кэҥээн иһэр. Ол курдук Малайзия, Индонезия, Соҕуруу Кэриэйэ, Бангладеш оскуолаларын кытта ситимнээх үлэ барар. Оскуола өйөбүлүнэн бырайыак салайааччылара, омук тылын учууталлара Аграфена Никулина уонна Ульяна Путренко оҕолор сайдалларыгар, омук тылын идэ оҥостуон баҕалаах оҕолорго инники олохторугар олук уурсаллар.
Үлэлээн кэлбит бырайыактар көмөлөрүнэн Аина Протопопова, Люба Захарова, Вераника Шишигина, Наина Макарова, Айталина Спиридонова, Вера Егорова, Вера Борисова, Юлия Борисова курдук үөрэнээччилэр идэлэрин баһылаабыттара, оттон Степанида Иванова, Александра Новикова, Марина Дьяконова, Арслан Килбясов, Лилияна Севастьянова онтон да атыттар омук тылын талан үүнэллэр-сайдаллар.
Алтана Артемьева, үөрэх салалтатын иитэр үлэҕэ уоннэ эбии үөрэхтээһиҥҥэ сүрүннүүр исписэлииһэ.