Дьокуускайга идэҕэ урутаан бэлэмниир киин тэрийиитинэн «Инникикэ билиэт» дойду улахан бырайыагын бастыҥ уопутугар анаммыт сылы түмүктүүр тэрээһиҥҥэ педагог-навигатордар Сатаҕайтан Наталья Борисова уонна Болугуртан Зоя Корнилова «Үөрэнээччилэри идэҕэ туһаайыыга көхтөөх кылааттарын иһин» үрүҥ көмүс бэлиэни уонна Махтал Суруктары туттулар.
Үөрүүлээх тэрээһиҥҥэ үөрэх уонна билим миниистирэ Нюргуна Соколова, идэҕэ урутаан бэлэмниир киин дириэктэрэ Владислав Хабаров, үөрэх салалталарын начаалынньыктара, исписэлиистэр ону тэҥэ холобур буолар туйгун үлэлээх педагогтар кытыннылар. «Инникикэ билиэт» бырайыагынан өрөспүүбүлүкэҕэ бастыҥ көрдөрүүлэммит педагог-навигатордар Сатаҕайтан Наталья Борисова уонна Болугуртан Зоя Корнилова миниистиртэн «Үөрэнээччилэри идэҕэ туһаайыыга көхтөөх кылаатын иһин» үрүҥ көмүс бэлиэлэри уонна Махтал Суруктары туттулар. Бастыҥ учууталлар идэҕэ туһаайыыга анал үөрэҕи ааспыттара, оскуола 6-11 кылаастарын үөрэнээччилэрин 100 бырыһыан бырайыак платформатыгар киллэрбиттэрэ, оҕолор анал тургутуулары ааспыттара, идэлэр хайысхаларын, идэлэри билсибиттэрэ үрдүктүк сыаналанна.
Кыттааччылар бырайыак үлэтин түмүктэрин ырыттылар, «Арассыыйа- мин саҕахтарым» уруогу көрдүлэр, Т.Г. Десяткин аатынан Дьокуускайдааҕы промышленнай тиэхиньикум, Чурапчытааҕы аграрнай-тиэхиньиическэй кэллиэс, Хаҥаластааҕы «Айтыын» сыыппара технологияларын кэллиэһэ үөрэтэр ньымаларын билистилэр, маастар кылааска сырыттылар. Түмүккэ оҕо аймаҕы идэҕэ эрдэттэн бэлэмнээн олоххо ситиһиилээх буоларын туһунан элбэх санаа этилиннэ.
Алтана Артемьева