Социалистическай Үлэ дьоруойа, сылгы иитиитигэр Бүтүн Сойуус таһымыгар холобур буолар үлэлээх Т.С. Лукин төрөөбүтэ 110 сылыгар анаммыт сылгыһыттар күрэхтэрэ Амматааҕы ипподромҥа аҕыс нэһилиэк хамаандатын түмтэ. Сыллата ыытыллар күрэххэ быйыл хаһааҥҥытааҕар даҕаны элбэх хамаанда кытта кэлбитэ интэриэс үрдээбитин бэлиэтэ диэн сыана быһыахха сөп.
Чэрдийбит ытыстардаах, сааскы күн номнуо килэччи сиэбит иэдэстэрдээх, сымса туттуулаах-хаптыылаах, кыһыҥҥы бытарҕан тымныыга, сайыҥҥы өҥүрүк куйааска аһаҕас халлаан анныгар сылдьан, сыспай сиэллээҕи тэнитэр туһугар сыралаһар сылгыһыт барахсан. Сылайар-элэйэр диэни билбэккэ күннэтэ сыспай сиэллээҕи кытта «өрө тустан» эти-аһы, олохтоох бородууксуйаны дэлэтэр дьон кинилэр буоллахтара. Аныгы сайдыылаах олоххо олорсон тыа хаһаайыстыбатыттан тэйэн хаалбакка хас эмитэ үйэ устата өбүгэ үгэһин тута сылдьар дьоммут билигин даҕаны аҕыйаҕа суохтар, бааллар эбээт.
Өрөспүүбүлүкэ үрдүнэн сылгыһыт күнүн көрсө, аммалар иннибитигэр уктар, холобур оҥостор киһибит, Социалистическай Үлэ Дьоруойа Тимофей Спиридонович Лукин төрөөбүтэ 110 сылыгар анаммыт быйылгы күрэххэ таһаарыылаах үлэлэринэн тыа хаһаайыстыбатын, сылгы иитиини туругурдар дьоммут ааттара дорҕоонноохтук ааттанна, ол дуораана сарсыардааҥҥы дьыбарга олорсон ыраахха диэри тилийэ көттө.
Бүгүн улуус баһылыгын Махталынан И.Я. Строд аатынан хаһаайыстыба сылгыһыта Петр Кондаков, «Үрүйэ» ТХПК сылгыһыта Вячеслав Рязанскай, Т.С.Лукин аатынан ТХПК сылгыһыта Валерий Яковлев наҕараадаланнылар. Улуус дьаһалтатын Махтал суругунан КФХ сылгыһыта Михаил Белолюбскай, «Алаһа» фермерскэй хаһаайыстыба сылгыһыта Алексей Иннокентьев, «Болугур» ТХПК сылгыһыта Илья Кузьмин, бэтэрээн сылгыһыттар Гаврил Христофоров, Дмитрий Неустроев сыралаах үлэлэрэ бэлиэтэннэ. Амма улууһун депутаттарын Сэбиэтин Бочуотунай грамотатын И.Я. Строд аатынан ТХПК бэрэссэдээтэлэ Василий Тимофеев, депутаттар Сэбиэттэрин Махталларын «Сахаагроплем» зоотехнига Олег Егоров, «Үрүйэ» ТХПК сылгыһыта Егор Килбясов, «Сэргэ» КФХ баһылыга Алексей Караканов тутаннар өрөгөйдөрө үрдээтэ. «Саха өрөспүүбүлүкэтигэр сылгыны иитиигэ кылаатын иһин» түөскэ аньыллар бэлиэнэн «Бөтүҥ» хаһаайыстыба сылгыһыта Иван Егоров наҕараадаланна. Оттон «Саха сирин тыатын хаһаайыстыбатын бэтэрээнэ» бочуоттаах бэлиэнэн тыа хаһаайыстыбатын бэтэрээнэ Семен Еримеев үлэтэ сыаналанна. СӨ тыатын хаһаайыстыбатын министиэристибэтин Махталын «Үөттээх» КФХ сылгыһыта Алексей Илларионов, КФХ баһылыга Николай Максимов, Т.С. Лукин аатынан хаһаайыстыба сылгыһыта Федор Судинов, И.Я. Строд аатынан хаһаайыстыба сылгыһыта Иван Тимофеев туттулар. Мантан салгыы «Амма улууһун тыатын хаһаайыстыбатын сайдыытыгар кылаатын иһин» түөскэ анньыллар бэлиэлэр хаһаайыннарын буллулар: үлэ бэтэрээннэрэ Владимир Константинов, Олег Лукин уонна Степан Лукин. Оттон улуус тыатын хаһаайыстыбата сайдыытыгар кылааттарын иһин управление Бочуотунай грамотатынан үлэ бэтэрээнэ Егор Борисов, «Мойоҕу» КФХ сылгыһыта Николай Гермогенов, ЛПХ Василий Данилов, биэнсийэлээх Петр Дмитриев, ЛПХ Артур Яковлев, Махталынан КФХ салайааччыта Гаврил Нерлов, Махтал суругунан ЛПХ Иван Гурьев, ЛПХ Петр Иванов, тэрээһиннэри ыытыыга өйөбүллэрин иһин Махтал суругунан «Амма» ТХППК салайааччыта Айысен Черноградскай, комментатор Михаил Чупров бэлиэтэннилэр.
Ити курдук тыа хаһаайыстыбатын туруу үлэһиттэрэ сыралара сыаналанан өрөгөйдөрө улаатан, тутум үрдээн биэрдилэр.
Үөһэ суруллубутун курдук, нэһилиэктэрин чиэһин 8 хамаанда көмүскээтилэр: «Давидофф» ХЭТ, Амма Наахара «Үөттээх» бааһынай хаһаайыстыба, Абаҕа нэһилиэгин Строд аатынан ТХПК, «Бөтүҥ» ТХПК, «Болугур» ТХПК, Сатаҕайдааҕы Лукин аатынан ТХПК, Соморсун «Сэргэ» бааһынай хаһаайыстыбата уонна Сулҕаччы нэһилиэгин Неустроев бааһынай хаһаайыстыбата.
Нэһилиэктэр икки ардыларыгар ыытыллар сыллата ыытыллар күүрээннээх күрэх быйылгы кыайыылаахтарынан кимнээх буоллулар? Амма улууһун аатын өрөспүүбүлүкэ таһымыгар кимнээх көмүскүөхтэрэй?
Күүрээннээх киирсиилэр түмүктэринэн сыарҕалаах атынан 1600 м. сүүрүүгэ үһүс миэстэни Соморсунтан Алаадьы, иккис миэстэни Бөтүҥтэн Чөрбөс, маҥнайгы миэстэни Сатаҕайтан Сиэрчээн ыллылар. Оттон хамаанданан күрэххэ бочуоттаах үһүс миэстэ Сулҕаччыттан Неустроев КФХ, иккис миэстэ Абаҕатааҕы Строд аатынан ТХПК, оттон кыайыылаах Амма нэһилиэгин «Давидофф» ХЭТ буоллулар. Маны тэҥэ анал ааттар хаһаайыннарын буллулар — «Аҕа саастаах кыттааччы» анал ааты И.Я. Строд аатынанТХПК сылгыһыта Петр Кондаков, «Саамай эдэр кыттааччы» ааты Сатаҕай хамаандатыттан Рустам Филиппов ыллылар.
Кыайыылаах хамаандаҕа өрөспүүбүлүкэ күрэҕэр ситиһиини баҕарабыт.
«Амма олоҕо» хаһыат.