Дьокуускай куоракка «Сыл бастыҥ иитээччитэ — 2024» өрөспүүбүлүкэтээҕи күрэх 15-с төгүлүн ыытылынна. Манна барыта республика араас улуустарыттан 26 иитээччи бэйэтин профессиональнай таһымын холонон көрдө. Амма улууһуттан ким кытынна, төһө ситиһиилээхтик?
Күрэххэ иитээччилэр бары интернет -портфолио, бэйэни билиһиннэрэр видеоролик, «Мин сатаммыт бырайыагым» диэн түһүмэхтэри кэтэхтэн бэлэмнээбиттэрин экспердэр үөрэтэн-көрөн сыаналаатылар. Онтон оҕону кытта иитэр-үөрэтэр дьарыгы, «Мин оҕону иитиигэ-үөрэтиигэ булбут табыгастаах ньымам», араас түгэннэргэ хайдах быһаарыыны ылыахтарын сөбүй диэн сорудаҕы Дьокуускай куорат уһуйааннарыгар тарҕаһан ыыттылар. Экспертэр быһаарыыларынан 2-с этапка 10 иитээччи талыллан таҕыста. Үһүс күн аны хас биирдии иитээччи маастар-кылаас биэрдэ, төрөппүттэргэ «Сиэр-майгы сыаннастара дьиэ кэргэн иитэр традицияларыгар» диэн семинары ыыттылар. Дьэ үһүс долгутуулаах түһүмэххэ 5 иитээччи талыллар мүнүүтэтин иитээччилэр да, ыалдьааччылар да долгуйа күүттүбүт.
Манна Сунтаар, Өлүөхүмэ, Амма, Таатта, Чурапчы иитээччилэрэ тахсан долгуйуубут өссө күүһүрдэ. Күрэх кэмигэр анал байыаннай дьайыы акциатыгар кыттыһан баран сетка өрүстүлэр, пряжа быаны ылан көмөлөстүлэр. Төрдүс күн идэҕэ туһаайыллыбыт кэпсэтии ток-шоу форматынан барда. Ток-шоуну педагогическай наука кандидата Колосова Елена Николаевна кыайа-хото ыытта. Манна иитээччилэр оҕону кыра сааһыттан иитии-үөрэтии тула санааларын үллэһиннилэр. Түмүккэ икки кыайыылаах тахсыахтааҕа. Дьэ ол курдук «Төрөөбүт төрүт тыл Сыл бастыҥ иитээчитэ» номинация кыайыылааҕа Амма нэһилиэгин «Хатыҥчаана» уһуйаан физкультураҕа инструктора Рустам Седых буолан бука барыбытын үөртэ, улууһун аатын өрө тутта.
Онон Рустам Сергеевич аны күһүн Татарстан өрөспүүбүлүкэтин Казань куоратыгар Саха Өрөспүүбүлүкэтин чиэһин көмүскүү барыаҕа. Онтон «Сыл бастыҥ иитээччитэ» ааты Чурапчы улууһун «Улыбка» ОСК иитээччитэ Анастасия Нестерова ылла. Кыайыылаахтарга итии-истиҥ эҕэрдэбитин тириэрдэн туран, Бүтүн Арассыыйатааҕы күрэхтэргэ ситиһиилээхтик кытталларыгар баҕарабыт. «Хатыҥчаана» уһуйаан коллектива түмсүүлээх үлэтин түмүгэ ситиһиилээх буолбутунан истиҥник эҕэрдэлиибит.
Эмма ДАВЫДОВА