От ыйын 13 күнүгэр Москва куорат Коломенскай музей-заповедник сиригэр үгэскэ кубулуйбут ыһыах ыһылынна. Ыһыахха кыттыыны Амма улууһуттан баһылык бастакы солбуйааччыта Василий Бураев, култуура уонна норуот айымньытын управлениетын салайааччыта Иван Иванов ыллылар.
“Кэлэр 2025 сылга дойдубут тэбэр сүрэҕэр ыытыллар Саха сирин аатыттан ыһыллар ыһыаҕы аммалар тэрийэбит. Онон улуус баһылыгын бастакы солбуйааччы Василий Иванович Бураевы кытта бу өрөспүүбүлүкэбит Арассыыйа таһымыгар ыытар тэрээһинигэр, төрүт үгэспитин атын дойду дьонугар билиһиннэрэр ыһыахпытыгар кыттыыны ыллыбыт. Быйыл ыһыаҕы булун улууһа бастайааннай бэрэстэбиитэлистибэни кытта кыттыһан ыытта.
Ыһыах генеральнай партнера “Алроса” хампаанньа, “АЯМ Транссервис” ХЭТ, спонсордарынан Сахабыт сирин бөдөҥ тэрилтэлэрэ буоллулар. Сүрдээх үчүгэй, улахан кэнсиэртээх ыһыах ыһылынна, элбэх ыалдьыт сырытта. Ыһыах бэлиэ түгэнинэн Булун улууһун баһылыгын солбуйааччы Леонид Егоров үрүҥ көмүс дуоҕаны Василий Ивановичка туттарыыта буолла. Бу дуоҕаны ылан биһиги кэлэр 2025 сылга, Кыайыы 80 сылын бэлиэтиир ытык үбүлүөйдээх сылга Москва куоракка ыһыаҕы ыһар эппиэтинэс ылынныбыт”, — диэн Иван Федорович сырдатта.
“Амма олоҕо” хаһыат