Амма улууһун олохтоохторо намнарга көмөлөрүн тиэртилэр

Нам улууһун  хас да нэһилиэгин бу саас халаан уута айбардаан, улахан хоромньуну таһааран олохтоохтору уолутта. Дьон-сэргэ хас эмитэ сыл үлэлээн мунньуммут малларын-салларын ууга былдьатан, ытыс соттон айманаллара кэмнээх буолуо дуо? Маннык уустук кэмҥэ Саха сирин бары олохтоохторо түмсэннэр ким төһө кыайарынан кинилэргэ көмөлөрүн оҥороллор. Бүгүн Амма улууһун олохтоохторуттан тобус толору көмө сээкэй тиэммит ПАЗ автобус Нам улууһугар тиийдэ.

«Ил Түмэн» судаарыстыбаннай мунньах дьокутаата Александр Корякин, улуус баһылыга Степан Кузьмин, култуура управлениетын салайааччы Иван Иванов, административнай хамыыһыйа сэкирэтээрэ Анатолий Стручков, дьаһалта хаһаайыстыбаннай салаатын салайааччыта Игорь Никитин уонна 1№-дээх оскуола суоппара Владимир Куприянов Амма бары нэһилиэктэрин дьоно-сэргэтэ хомуйбут астары-үөллэрин, таҥастарын, итиэннэ 50-тан тахса куул сүөһү сиир бурдугун Нам олохтоохторугар тиэртилэр.

-2018 сыллаахха Амма улууһа ууга барбытыгар биир даҕаны улуус туора турбатаҕа, бука бары түмсэннэр көмө оҥороннор дьоммут-сэргэбит оннуларын булан кыстыкка үктэммиттэрэ. Онон аммалар ыксалллаах кэмҥэ өйөһүү, өйдөһүү хайдах курдук наадатын билэр бөҕө буоллахпыт. Быйыл Намҥа буолбут быһыы-майгы содулун туоратарга күүс-көмө буолар сыалтан биһиги волонтерскай ыстаап арыйаммыт нэһилиэнньэттэн элбэх көмө хомулунна, биир да нэһилиэкпит туора турбата. Туттар мал-сал, ас-үөл, харчы түмэммит бүгүн тустаах дьоҥҥо илдьэн тиэртибит,- диэн баһылак Степан Николаевич дьонугар-сэргэтигэр өйөбүл буолбуттарыгар махтанан туран сырдатар.

 

Уонча күн устата улуус дьаһалтатын көҕүлээһининэн таҥас- сап, ас, күннээҕи наадыйар хаһаайыстыбаннай тэриллэри тутар хос арыйан үлэлэттибит. Көмөнү тутууга Амма дьахталларын хамсааһыныттан кыттыстылар. Амма дьоно-сэргэтэ куруук буоларын курдук ууттан эмсэҕэлээбит дьоҥҥо көмө оҥорорго көхтөөҕүн көрдөрдө. Үгүс нэһилиэктэр, тэрилтэлэр, урбаанньыттар, биирдиилээн дьон ытык кырдьаҕаска тиийэ, бары илии тутуурдаах, өттүк харалаах кэлэн үтүө сүрэхтэринэн көмө оҥордулар. Маны таһынан харчынан көмө Нам улууһугар счет нөҥүө оҥоһулунна. Бары көмөлөспүт тэрилтэлэргэ, урбаанньыттарга, Амма улууһун олохтоохторугар Нам улууһугар халаан уутуттан эмсэҕэлээбиттэргэ көмө оҥорор үлэни тэрийбит бөлөхтөн барҕа махталбытын биллэрэбит. «Ойуурдаах куобах охтубат, дьонноох киһи тутайбат» диэн былыргыттан кэлбит өс хоһооно маннык түгэннэргэ олус суолталааҕын өбүгэлэрбит бэргэнник этэн хаалларбыттар,- диэн көмөнү хомуйар, түмэр ыстаап аатыттан «Россия ийэлэрэ» общественнай түмсүү кыттыылааҕа Матрена Карманова бар дьонугар махталын тиэрдэр.

 

“Амма олоҕо” хаһыат.

Читайте дальше