Кэрэни, үйэлээҕи үксэтэр Аммабыт улууһун уустара саха омук төрүт култууратын, баай нэһилиэстибэтин, норуот уус — уран оҥоһуктарын үйэтитэр уонна сайыннарар ытык аналларын чиэстээхтик толороллор, айымньылаахтык үлэлииллэр. Ол чэрчитинэн Болугур нэһилиэгэр алтынньы ый 18 күнүгэр «Кэрэ кэм кэрэһитэ — Болугур» диэн Амма улууһун уустара түмсэн киэҥ хабааһыннаах тэрээһин ыытылынна.
СӨ норуотун маастара, улуустааҕы «Айар уус» түмсүү салайааччыта Устинов Степан Прокопьевич көҕүлээһининэн арыллыбыт «Уус кыһата» уһанар дьиэбитигэр уустар аҕалбыт болгуо таастарынан сахалыы быһаҕы охсууга маастар — кылаас ыытылынна, салҕыы үлэ хаамыытын ырытыһар төгүрүк остуол буолла. Онно Амма улууһун баһылыгын социальнай эйгэҕэ солбуйааччы Илларионова Нюргуяна Ивановна, Амма улууһун депутаттарын Сэбиэтин бэрэссэдээтэлэ Колосов Владимир Владимирович, «Болугур нэһилиэгэ» МТ баһылыгын солбуйааччы Эверстова Любовь Афанасьевна, Амма улууһун тимир уустарын түмсүүтүн салайааччыта Алексеев Роман Александрович, Амма улууһун култуураҕа уонна норуот айымньытын салалтатын фондаҕа специалиһа Судинова Ольга Николаевна, Амматааҕы «Сыккыс» туос-иис түмсүү салайааччыта Новикова Клавдия Алексеевна, Болугурдааҕы «Арчылаана» эбэлэр түмсүүлэрэ (салайааччы Иванова Ульяна Ивановна) кыттыылаах төгүрүк остуол буолла. Үбүлүөйдээх Онуфриев Нестер Семеновичка, Устинов Игнатий Александровичка Бочуотунай грамота, Михайлова Ульяна Майродовнаҕа — Маай кыыһыгар уонна тэрийбит Устинов Степан Прокопьевичка бэлэх, улуус баһылыгын махтал суруга туттарылынна.
Маастар — кылааска О.П. Иванова — Сидоркевич аатынан Амматааҕы айар сайдыы киинин эбии үөрэхтээһинин «Наследие» куруһуогун иитиллээччилэрэ, Е.Е. Пахомов аатынан орто оскуола 7, 8 кылааһын уолаттара Кожурова Сахаяна Юдовна салалталаах кыттыыны ыллылар уонна улууспут нэһилиэктэрин уус кыһатыгар саҕалаан эрэр эдэр ыччаттарбыт сырыттылар.
«Кэрэ кэм кэрэһитэ — Болугур» тэрээһиммитигэр»Сарыада» фольклорнай бөлөх, мас ууһа Октябрь Аянитов эҕэрдэ ырыаларынан, «Сырдык» үҥкүү ансаамбыла арыылаах алаадьынан, уохтаах кымыһынан, саламаатынан айах туттулар. Күммүт бэт көхтөөхтүк, туһалаахтык ааста.
Кэлбит ыалдьыттарбытыгар «Эбээ чэйин», Кулун атах туос бэлиэбитин бэлэх ууннубут. Айар — тутар дьоҕурдаах, үлүскэн үлэлээх уус дьоммут үтүө холобур буола, дьон — сэргэ билиниитин ыла туруҥ диэн алгыс тылбытын аныыбыт.
Евдокия Платонова.