Амма волейболистара инники күөҥҥэ

Дьиэ кэргэн уонна Оҕо саас сылын чэрчитинэн Саха сиригэр араас таһымнаах күрэхтэр ыытыллан үгүс дьону түмэллэр. Ол курдук, кулун тутар бүтэһик күнүгэр Мэҥэ Хаҥалас улууһун Аллараа Бэстээҕин «Парус» спортивнай саалатыгар волейболга дьахталларга дьиэ кэргэн аһаҕас күрэҕэ бэрт сэргэхтик тэриллэн ыытылынна.

Барыта илиҥ эҥэртэн 6 хамаанда күөн көрүстэ. Хамаанда састаабыгар 9 кэрэ аҥар киирдэ: 2006 с.т. диэри саастаах икки оскуола кыыһа, 1968 сылга диэри саастаах икки Кэрэ Куо, икки 1967 сылтан үөһэ саастаах Далбар хотун, итиэннэ үс солбуйар оонньооччу. Мэҥэ Хаҥаластан Куприяновтар, Оконешниковтар,  Егоровтар, Свинобоевтар дьиэ кэргэн оонньоотулар. Амматтан Соморсунтан Максимовтар уонна Амма Наахараттан Пахомовтар дьиэ кэргэн кытыннылар.  Өнньүөстэн төрүттээх Пахомовтар хамаандаларыгар Людмила Алексеева, Зоя Семёнова, Ульяна Пахомова, Анастасия Александрова, Ефросинья Пахомова, Марина Макарова, Аэлита Пахомова, Нарыйаана Макарова уонна Наахараттан сиэн балтылара Валерия Кривошапкина киирдилэр.

Оонньуу эргиир систиэмэтинэн ыытылынна. Уопсайа бу күн «Паруска» 15-с оонньуу түһүлгэтигэр кыргыттар бустулар-хаттылар. Тыҥааһыннаах күрэх ортотугар отут мүнүүтэлээх сандалы остуол тэрилиннэ. Остуол тула итии чэй иһэ-иһэ спортсменнар санаа атастастылар, инники былааннарын барыллаатылар. Атырдьах ыйыгар Аммаҕа күрэх ыытарга тэрийээччилэр, олохтоохтор баҕаларын эттилэр. Уһун эрийсиилээх оонньуу кэнниттэн Амма улууһун Амма Наахараттан Пахомовтар дьиэ кэргэн кэрэ аҥардара бастакы,  Мэҥэ Хаҥалас Чыамайыкытыттан Куприяновтар иккис, Амма улууһун Соморсун нэһилиэгин Максимовтар үһүс миэстэҕэ тахсан үөрүү өрөгөйүн биллилэр. Кыайыылаахтар кубогынан, мэтээлинэн, грамотанан наҕараадаланнылар

. Бу күн бастыҥтан бастыҥнарга анал бириистэр ананнылар. Амма Наахара хамаандатыттан Анастасия Александрова «Бастыҥ туруорааччы», ЧИФКиС устудьуоҥката Аэлита Пахомова «Бастыҥ быһааччы» анал аат хаһаайыннара буоллулар. Ситиһии сиэтиилээх сандал саас сырдыгынан сыдьаайан успуорду олох аргыһа оҥостор кэрэ кыргыттарбытыгар үрдүк дабайыылары, үтүө сонуннары эрэ бэлэхтээтин.

Ирина Корякина – Олесова.

Читайте дальше