Дьокуускай куоракка үөрэх тэрилтэлэрин икки ардыларыгар ыытыллар “Көтөр мээчик” өрөспүүбүлүкэтээҕи волейбол күрэҕин финала түмүктэннэ. XI төгүлүн ыытыллар күрэхтэһии Саха сиригэр Оҕо саас сылыгар ананна. Волейбол туонатын бастыҥ хамаандатын аатын ылар иһин уолаттарга 7, кыргыттарга 12 хамаанда кииристилэр.
Оскуола оҕолорун ортолоругар сыл биир самаай күүтүүлээх, долгутуулаах күрэҕэр хаһан даҕаны буоларын курдук, Амма хамаандалара көхтөөх кыттыыны ыланнар улахан утарсыылары оҥордулар. Икки күннээх финал түмүгэр волейбол балаһааккатын аммалар хаардыы хаамтылар. Ол курдук, Сулҕаччыттан кыргыттар хамаандалара (тренер Сардаана Христофорова) чөмпүйүөн, уолаттарга Амма 1 №-дээх оскуолатын уолаттара (тренера Лена Константинова) чөмпүйүөн аатын сүктүлэр, Амма 2 №-дээх оскуолатын уолаттара (тренер Семен Килбясов) боруонса мэтээллэри кэттилэр. Маны сэргэ Сулҕаччыттан Мичийэ Бурцева, 1 нүөмэрдээх оскуолаттан Артём Илларионов, 2 нүөмэрдээх оскуолаттан Дима Слепцов “Бастыҥ оонньооччу” анал ааттары ылан улуус өрөгөйүн өссө үрдэттилэр.
Амма волейболун инники эрэллэригэр инникитин ылбыт кирбиилэрин ыһыктыбакка өссө үрдүк ситиһиилэри баҕарабыт.
“Амма олоҕо” хаһыат.