Л.В.Киренскэй аатынан Амматааҕы лиссиэйгэ уонна Е.Е.Пахомов аатынан Болугур орто оскуолатыгар улуус оскуолаларын оҕолоро «Саха сирин тимир суоллара» акционернай уопсастыба уонна Р.И.Брызгалов аатынан Аллараа Бэстээхтээҕи тырааныспар техникумун бэрэстэбиитэллэрин кытта көрүстүлэр.
Манна Амма 1№-дээх, Амма 2№-дээх, лиссиэй, Абаҕа, Амма –Наахара, Болугур, Соморсун, Чапчылҕан, Чакыр оскуолаларын 7-11 кылаастарыттан барыта 176 үөрэнээччи сырытта.
«Саха сирин тимир суоллара» аахсыйалаах уопсастыба каадырдары бэлэмнээһиҥҥэ инженерэ Надежда Ивановна Иванова Сахабыт сиригэр тимир суол баар буолуоҕуттан бу хайысхаҕа үлэһиттэри бэлэмниир улахан сыал-сорук турбутун бэлиэтээтэ. Ол курдук 2011 сыллаахха Мэҥэ Хаҥалас улууһун Аллараа Бэстээҕэр тимир суол техникума аһыллан олохтоох ыччат үөрэнэн үлэлээх буолубутун, тимир суол сылтан сыл сайдан иһэрин ыйда. Бу курдук хампаанньа уонна техникум өр сылларга бииргэ ыкса үлэлэһэллэрин, маны таһынан оҕолор Хабаровскайга баар Уһук Илиҥҥи судаарыстыбаннай суол-иис ситимин университетын туһунан элбэҕи иһиттилэр. Аныгы массыыналары уонна тэриллэри оҥорор, тырааныспары салайар, дойдулар икки ардыларыгар дьону, таһаҕаһы тиэйэр, автоматизированнай ситимнэри оҥорор, тимир суолу тутар, инженернэй тутуулары ыытар, докумуону бэрийэр, салайааччы буолар, атыы-эргиэн, ньиэп, гаас дьыалатын, таможня, туризм эйгэтин үлэһиттэрин, экэнэмиис, финансист, юрист онтон да атын идэлэри ылыахтарын сөбүн билиһиннэрдэ.
Аллараа Бэстээхтээҕи тырааныспар техникумун преподавателэ Анна Алексеевна Неустроева «Саха сирин тимир суоллара» аахсыйалаах хампаанньаҕа уонна суол-иис тэрилтэлэригэр үлэһиттэри бэлэмниир Саха сиригэр биир инники күөҥҥэ сылдьар орто үөрэх кыһата буолалларын бэлиэтээтэ. Манна тимир суолу тутар, локомотивтары, вагоннары көрөр-истэр, айаҥҥа ыытар, тимир көлөнү өрөмүөннүүр, таһаҕаһы, дьону тиэйиини тэрийэр, сыбааркалыыр испэсэлиистэр үөрэнэллэрин эттэ. Кыргыттар эмиэ үөрэнэн Аллараа Бэстээххэ, Алдаҥҥа тимир суол ыстаансыйаларыгар дьуһуурунайынан, проводниктарынан үлэлиэхтэрин, пуойас, таһаҕас кэлэрин-барарын салайыахтарын, вагоннары айаҥҥа атаарыахтарын сөбүн кэпсээтэ. 9 кылаас кэнниттэн тимир суолу тутууга, тимир суол састаабын көрөр-истэр үлэһиттэр, сыбаарсыктар, оттон 11 кылаас кэнниттэн массыыналары өрөмүөннүүр, көрөр-истэр маастардар, таһаҕаһы, дьону тиэйиини тэрийээччилэр, сигнализация, централизация блокировка тэриллэрин электромонтера, тимир суол састаабын көрөр-истэр дьон буолан тахсаллар эбит. Хабаровскайтан, Новосибирскайтан преподавателлэр, ону тэҥэ «Саха сирин тимир суоллара» хампаанньа үлэһиттэрэ эмиэ үөрэтэллэрэ элбэх билиини ылалларыгар көмө буоларын эттэ. Техникумҥа үөрэнэргэ, олорорго уонна сайдарга усулуобуйа барыта тэриллибит. Устудьуоннар 250 миэстэлээх толору хааччыллыылаах саҥа тупсаҕай уопсайдаахтар, истипиэндьийэлээхтэр, маны таһынан үөрэх бастыҥнара анал истипиэндьийэлэринэн наҕараадаланналлар. Техникумҥа үөрэнэр устудьуоннар бары кэриэтэ сахалар буолаллара тыа сириттэн ыччат техникумҥа хото кэлэрин туоһута буолар. Түмүккэ ыалдьыттар саамай сэҥээрэн, интэриэһиргээн истибит оҕолорго бэйэлэрин сэмэй бэлэхтэрин туттардылар уонна кэскиллээх аныгы кэм үөрэҕин таланнар тимир суол үлэһиттэрэ буолалларыгар ыҥырдылар.
Көрсүһүүлэри тэрийбит Амматааҕы лиссиэй дириэктэригэр Дария Иннокентьевна Захароваҕа уонна Болугур оскуолатын дириэктэригэр Петр Михайлович Филипповка үөрэх салататын аатыттан улахан махталбытын тириэрдэбит!
Алтана Артемьева