Амма 1 №-дээх оскуолатыгар өр кэмҥэ таһаарыылаахтык үлэлээбит бэтэрээн учуутал Матрёна Кононовна Карманова ыалдьыттаата. Кини «Моя трудовая молодость» диэн үһүс сылын үлэлиир видео-бырайыак акциятын туһунан сырдатта.
Көрсүһүүнү оскуола дириэктэрэ Николай Александрович Ларионов, завучтар Ольга Александровна Окорокова, Зоя Николаевна Иванова, Наталья Павловна Николева уонна Степан Андреевич Игнатьев, оскуола түмэлин салайааччыта Вера Нестеревна Бессонова тэрийэн ыыттылар.
—Алтан нэһилиэгин олохтоохторо Борисова Наталья Васильевна уонна Дьячковская Римма Николаевна тыл көтөҕөннөр 1950 сылтан саҕалаан ол кэм ыччаттара хайдах үлэлээн-хамсаан, үөрэнэн, иитиллэн, сайдан кэлбиттэрин туһунан видео-бырайыак толкуйдаммыт. Бу бырайыагы улуус таһымыгар ылынан «Россия ийэлэрэ» общественнай хамсааһын 70 киһилээх үлэлиир бөлөҕө улуус үрдүнэн быһа холоон 700 видеону уһуллулар. Бу матырыйаал барыта улуус библиотекатыгар хараллар,- диэн Матрена Кононовна акция туһунан сырдатта.
— Уһуйааччы уонна аҕа сүбэһит сылын чэрчитинэн, оскуолабыт 155 сыллаах үбүлүөйүн көрсө «Ветераны педагогического труда» диэн видеоконкурс биллэрбиппит. Бу күрэххэ кылаастар бэтэрээн учууталлар туһунан дьиэтээҕи архыып матырыйаалларын туһанан, бэтэрээннэри ыҥыран кылаас чаастарыгар көрсүһүүлэри тэрийэн, интервью ылан, оскуола түмэлин докумуоннарын, хаартыскаларын туһанан бэртээхэй видеолары оҥорбуттара. Бу видеолары барытын ютуб ханаалга киллэрэн, куар кодтаан кинигэ оҥорон бэтэрээн учууталларбыт ааттарын үйэтиттибит.
Олус суолталаах, дириҥ ис хоһоонноох, үйэлээх үлэ буолла диэн астынабыт. Маны барытын тэрийбит, сүрүннээбит кылаас салайаачыларбытыгар, үлэлэспит оҕолорбутугар дириҥник махтанан туран кинигэбитин Матрёна Кононовнаҕа бүтүн республикатааҕы «Моя трудовая молодость» акцияҕа кыттыһарбытыттан үөрэн туран бэлэх ууннубут,- диэн методическай үлэҕэ дириэктэри солбуйааччы Окорокова Ольга Александровна үөрэ бэлиэтээтэ.
Бу курдук оскуолабыт оҕолоро, кылаас салайааччылара сыралаах үлэлэрин түмүгэ — 24 бэтэрээн учуутал туһунан «Ветераны педагогического труда» диэн кинигэ өрөспүүбүлүкэтээҕи акцияҕа кыттыыны ыларыттан олус үөрдүбүт, долгуйдубут уонна инникитин да бу үлэбит салҕанан барыа диэн эрэнэбит.
Дайаана Алексеева, Айна Дмитриева, Алина Симонова, 9 “а” кылаас үөрэнээччилэрэ,
АеСеШник оскуола хаһыатын корреспонденнара.