Амма улууһун мүөттээх ыҥырыанан дьарыктанааччылара анал байыаннай дьайыыга сылдьар биир дойдулаахтарбытыгар бэйэлэрин бородууксуйаларын бэлэмнээтилэр. Бу туһунан улуус “Амарах сүрэх” уопсастыбаннай түмсүүтүн салайааччыта Римма Алексеева иһитиннэрдэ.
“Биһиги улууспут мүөттээх ыҥырыанан дьарыктанааччылара бэйэлэрин быйылгы бородууксуйаларын аҕалан туттардылар уонна анал байыаннай дьайыыга сылдьар уолаттарбыт дойдуларын мүөтүн амсайан этэҥҥэ сырыттыннар, чэгиэн буоллуннар уонна кыайыы көтөллөөх дойдуларыгар эргиллэн кэллиннэр диэн алгыс тылларын анаатылар. Ол курдук Ассоциация бэрэссэдээтэлэ Эльвира Васильевна Пестерева уопсайа 10 киилэ мүөтү, 35 бааҥканы аҕалан туттарда. Ыҥырыанан дьарыктанааччылар Мээндигиттэн Татьяна Яковлева, Серафима Стручкова, Алтантан Сергей Кузьмин, Болугуртан Эльвира Пестерева, 2-с Чакыртан Светлана Новикова, Соморсунтан Василий Данилов, Амматтан Марат Залялов, ону кытта өссө урбаанньыт Людмила Сутакова Алтай минньигэс мүөтүттэн аҕалан эмиэ хас бааҥканы биир дойдулаахтарбытыгар диэн аҕаллылар.
Маны сэргэ Амма олохтооҕо Георгий Панкратьевич Бессонов уолаттарга 70000 солк суумаҕа сигареталары биэрбитэ. Биһиги бу бары амарах санаалаах дьоммутугар истиҥник махтанабыт. Көмөнү барытын суулаан бүгүн Аллараа Бэстээххэ ыыттыбыт.
Онтон бэйэбит улууспут салалтата анал байыаннай дьайыыга командировкаҕа тиийдэҕинэ, туттарыаҕа. Баһыылкалар Аллараа Бэстээхтэн Новоазовск куоракка массыынанан барыахтара. Баһыылкалары кытта УАЗ-фермер уонна үс матасыыкыл барыахтара. Тиийбит көмөлөрү волонтер Василий Швердин бириэмэтигэр тириэрдэр. Өссө төгүл туора турбат, куруутун көмөҕө кэлэр дьоммутугар дириҥ махтал тылларын аныыбыт. Дойду үтүө дьоннордоох буолан хайаатар да кыайыыны ситиһиэхпит”, — диэн Римма Васильевна сырдатта.
«Амма олоҕо» хаһыат