Оҕо суруйааччыта, ырыаһыт-бэйиэт, эколог суруйааччы, этнограф, билгэһит, кыраайы үөрэтээччи, Саха Өрөспүүбүлүкэтин бочуоттаах ытык кырдьаҕаһа Иннокентий Михайлович Сосин төрөөбүтэ 95 сылынан ахсынньы 1 күнүгэр Н.Е. Иванов аатынан Бөтүҥ орто оскуолатын уонна академик Л.В. Киренскэй аатынан Амма лицейин холбоһуктаах тэрээһиннэрэ буолла.
Ол курдук, күн бастакы аҥарыгар оскуолабыт бибилэтиэкэрэ Борисова Василина Васильевна 1, 2 кылаастарга И.М. Сосин айымньыларынан оруоллаах оонньуулаах кылаас чааһын уонна 10-11 кылаас оҕолоругар викторина ыытта. Иннокентий Михайлович хос сиэнэ Ира Захарова Амма лицейин 7 кылаас үөрэнээччитэ хос эһэтин туһунан сэдэх матырыйааллардаах «Холбука түмэлэ» кылаас чааһын 3, 4, 5, 6 кылаас оҕолоругар кэпсээтэ. Амма лицейин үөрэнээччилэрэ Иннокентий Сосин «Кымырдаҕас уйата» кэпсээнигэр олоҕуран оҥорбут викториналарын Бөтүҥ 3-4 кылаас оҕолоругар ыыттылар. Кини хоһооннорун лиссиэй, Бөтүҥ оҕолоро турукка киирэн бэрт иэйиилээхтик аахтылар.
Эбиэт кэннэ оскуолабыт бастакы 1975 с. выпускниктарыгар анаан «Литературнай салон» бэрт интэриэһинэйдик ааста. Бу тэрээһини Бөтүҥ орто оскуолатын ветерана, СӨ Үтүөлээх учуутала Светлана Алексеевна Неустроева иилээн-саҕалаан ыытта. Тэрээһиҥҥэ СӨ үтүөлээх учуутала, педагогическай наука кандидата, Амма нэһилиэгин бочуоттаах олохтооҕо, академик Л.В. Киренскэй аатынан Амматааҕы лицей директора, Иннокентий Михайлович Сосин төрөппүт кыыһа Захарова Дария Иннокентьевна, СӨ үтүөлээх учуутала, академик Л.В. Киренскэй аатынан Амматааҕы лицей саха тылын уонна литэрэтиирэтин учуутала Ноговицына Мария Дмитриевна, СӨ Үөрэҕириитин туйгуна, Н.Е. Иванов аатынан Бөтүҥ орто оскуолатын директора Иванова Акулина Семеновна, Бөтүҥ нэһилиэгин олохтоох кыраайы үөрэтээччи Нестерев Алексей Михайлович, ырыа айааччы Петр Ефремов, 1975 сыллаах литературнай куруһуок иитиллээччитэ, урбаанньыт, оскуола мецената Васильев Иван Васильевич кыттыыны ыллылар. Тэйиччиттэн олорон Иннокентий Михайлович Сосин кыра кыыһа, СӨ культуратын туйгуна, ХИФУ научнай библиотека сүрүннүүр специалиһа Сосина Октябрина Иннокентьевна, СӨ геокультурнай сайдыы институтун методиһа, РФ театральнай деятеллэрин союһун чилиэнэ, СӨ театральнай диэйэтэллэрин союһун бырабылыанньатын чилиэнэ, СӨ культуратын үтүөлээх үлэһитэ Адамова Саргылана Саввична-Алтан Куо, сиэнэДьокуускайдааҕы финансовай-экономическай колледж преподавателя Трапезникова Евдокия Алексеевна, СӨ Үөрэҕириитин туйгуна, РФ уопсай үөрэхтээһинин Бочуоттаах үлэһитэ, өр кэмҥэ Бөтүҥ орто оскуолатыгар директорынан үлэлээбит, педагогическай үлэ ветерана Новиков Иосиф Иосифович кэпсэтиигэ холбоннулар.
Үөрүүлээх быһыыга-майгыга 1975 сыллаахха Бөтүҥ орто оскуолатын «Сардаҥа» литературнай куруһуогун илиинэн суруллан таһаарбыт кулун тутар ыйдааҕы бастакы нүөмэрдээх альманаҕын Иннокентий Михайлович кыыһа Дария Иннокентьевна биһиги оскуолабытыгар бэлэх уунна. Бөтүҥ орто оскуолатын 1975 сыллаах выпускниктарыгар кылаастарын салайааччыта Иннокентий Сосин анаан айбыт «Оскуолабар» хоһоонун ырыатын сыа-сым курдук тутан, сүрэхтэригэр кистээн, өйдөрүгэр хатаан илдьэ сылдьар гимн оҥостубут ырыаларын ыллаатылар. Ыалдьыттар Иннокентий Михайлович 100 сааһын көрсөргө саҥа этиилэри, тэрээһиннэри торумнастылар.
Бу күн кэлбит ыалдьыттар «Кэскил» И.Сосиҥҥа анаммыт хаһыат таһаарыытын бэлэх тутан үөрэн-көтөн, ирэ-хоро кэпсэтэн, ааспыты ахтыһан тарҕастылар.
Мария ИВАНОВА, дириэктэри методическай үлэҕэ солбуйааччы,
Анастасия ЛАЗАРЕВА, саха тылын уонна литературатын учуутала.