«Юнармия» Бүтүн Арассыыйатааҕы байыаннай-патриотическай уопсастыбаннай хамсааһын Амматааҕы улууһун штабын начаалынньыгынан анал байыаннай дьайыы кыттыылааҕа, старшай сержант, «Хорсунун иһин» мэтээл хаһаайына, бойобуой дьайыылар бэтэрээнэ, элбэх хайысхалаах педагог Мичил Винокуров ананан бу күннэргэ үлэтин саҕалаата.
Амматааҕы үөрэх салалтатыгар патриотическай иитиини көҕүлүүр «Юнармия» байыаннай-патриотическай уопсастыбаннай хамсааһын эппиэттээх салайааччытынан Мичил Винокуров ананна. Орто Халыма Байды нэһилиэгиттэн төрүттээх саҥа салайааччы И.Е.Винокуров аатынан Намнааҕы технология уонна дизайн педагогическай коллеһыгар, М.К.Аммосов аатынан ХИФУ физкультура уонна ОБЖ салааларыгар үөрэммитэ, Астрахань куорат идэни үрдэтэр киинигэр 3D моделированиеҕа, Дьокуускайга наукалар академияларыгар, идэни үрдэтэр институттарга, кииннэргэ идэтин таһымын үрдэппитэ. Орто Халыма Хатыҥнааҕар үлэ учууталынан, Орто Халыма уһуйааныгар физкультура инструкторынан, Орто Халыма, Хаҥалас Өктөм оскуолаларыгар физкультура, ОБЖ учууталынан таһаарыылаахтык үлэлээбитэ. Үөрэхтээһин эйгэтигэр чинчийиигэ, IT технологияларга, техническэй, спортивнай, байыаннай хайысхаларга, патриотическай иитиигэ, волонтерскай үлэҕэ элбэх ситиһиилэммитэ, «Эбии үөрэхтээһин педагога», «Сыл иитээччитэ» аат кыайыылаахтара, ону таһынан «Мин чинчийээччибин», «Мин инженербин» өрөспүүбүлүкэтээҕи күрэхтэһиилэргэ элбэх үөрэнээччилэрэ бастыҥ көрдөрүүлэммиттэрэ.
Айымньылаахтык үлэлиир педагог ааспыт сылга баҕа өттүнэн «Боотур» БАРС-II этэрээтигэр Харьков туһаайыытынан сулууспалаабыта. Старшай сержант «Халыма» диэн ааттанан радиоэлектроннай охсуһуу снайперынан сылдьыбыта, «Хорсунун иһин» мэтээлинэн наҕараадаламмыта. Хоту дойду хоһууна Амма сиригэр кэлэн үлэтин саҕалаата, бу күннэргэ үөрэх үлэһиттэрин өрөспүүбүлүкэтээҕи сүбэ мунньаҕар кытта сылдьар.
Мичил Алексеевич айылҕаҕа сылдьарын ордорор, иллэҥ кэмигэр уһанарын сөбүлүүр. Көҥүл тустуунан, ох саанан, буулдьанан ытыынан, остуол тиэнниһинэн, буоксанан дьарыктана сылдьыбыт буолан успуортка чугас. Элбэх оҕолоох ыалларга, доруобуйаларынан хааччахтаах, тулаайах оҕолорго анаммыт аахсыйаларга куруук кыттар.
Айар куттаах эр хоһуун хоһоон да суруйан холонор. Бойобуой дьайыыга сылдьан түүн позицияҕа окуопаҕа сытан Дьоруой Ийэтигэр, Орто Халыма бочуоттаах олохтооҕо Татьяна Васильевнаҕа анаабыт хоһооно Саха сиригэр хаһыатынан, социальнай ситимнэринэн, тэлэбиидэнньэнэн киэҥник билиннэ.
«Педагог буоларым быһыытынан идэбинэн туһанан саҥа көлүөнэ оҕолорун дьиҥнээх патриот, Ийэ сирдэригэр бэриниилээх, төрөөбүт дойдуларын таптыыр, ытыктыыр, үтүө үгэстэрин утумнуур, сиэрин-туомун тутуһар, эттэринэн-хааннарынан сайдыылаах, билиилээх, өйдөөх, кырдьаҕаһы, кыамматы убаастыыр буолалларыгар аныгы үйэ хайысхаларынан байыаннай иитиини дьүөрэлээн сайдан тахсалларыгар үлэни ыытыам. Сүрүн болҕомтобун Амма улууһун оскуолаларыгар «Юнармия» Бүтүн Арассыыйатааҕы байыаннай-патриотическай уопсастыбаннай хамсааһын кэҥээн иһэригэр, анаммыт салайааччылар интэриэстээхтик, таһаарыылаахтык үлэлииллэригэр, хас биирдии тэрээһиннэргэ көхтөөхтүк уонна ситиһиилэхтик кытталларыгар ууруом», — диэн санаатын үллэстэр Мичил Алексеевич.
Ийэкээм бырастыы…
(Байыас Мичил Винокуров ийэтигэр анаабыт хоһооно)
Бырастыы гын, эн миигин, Ийэкээм,
Кутаа уот сэриигэ мин бардым,
Быстах санаа уутугар буолбатах —
Эр санаа ылынан барарбын!
Бырастыы гын, эн миигин, Ийэкээм,
Соҕотох хаалларан барда диэн…
Кэлиэҕэ уолуҥ эргиллэн,
Кууһан кэлэн сыллыаҕа эйигин…
Бырастыы гын, эн миигин Ийэкээм,
Билэбин эн түүн утуйбакка кэтэһиэҥ…
Күн аайы түннүккэр олорон
Массыына тыаһын иһиллиэҥ…
Бырастыы гын эн миигин, Ийэкээм,
Оргууйдук тэлгэһэҥ таһыгар хаамыаҕыҥ,
Өр да өр одуулаан тураҥҥын
Уулусса уһугун керүөҕүҥ.
Бырастыы гын, эн миигин, Ийэкээм
Эн уолгар эрэниэҥ, өйдүүбүн.
Өрө тыынан, хараҕыҥ уутун соттуоҕуҥ
Киэн туттан санааҕын чэпчэтиэҥ…
Бырастыы гын эн миигин, Ийэкээм,
Кыайыы тосхойуо, Эн,эрэн!
Айыылартан эн куруук көрдөһөн,
Уолгар иккис тыыны киллэриэҥ!
Ийэкээ, Ийэкээм барахсан,
Кэлиэҕим дойдубар эргиллэн!
Толору астаах остуолгар олорон
Үөрүөхпүт эн биһи дьоллонон!
Алтана Артемьева.