Амма киин балыыһатыгар үүммүт сыл бастакы оҕото тохсунньу 5 күнүгэр күн сирин көрдө. Бу туһунан биһиэхэ балыыһа төрүүр отделениетын сэбиэдиссэйэ Евдокия Долгунова иһитиннэрдэ.
«Бу сылга үктэнэн баран отделениебытыгар бастакы оҕо- уол оҕо тохсунньу 5 күнүгэр эбиэттэн киэһэ 4 чаас саҕана күн сирин көрдө. Эдэр ыалга, Оконешниковтарга, бу иккис уол оҕолоро. Кинилэр бэйэлэрин баҕаларынан сүбэлэһэн «Сандал» диэн оҕолонор саалабытыгар кырачааннарыгар күн сирин көрдөрдүлэр. Ол курдук отделениебытыгар икки саала баар. Биир уопсай уонна ийэ чугас дьоно кыттыылаах төрүүр «Сандал» диэн саала. Манна РОУС, ол эбэтэр «Роды ориентированные с участием семьи» диэн бырагырааманан үлэлиибит. Уолчаан ийэтинээн этэҥҥэлэр»,- диэн Евдокия Степановна кэпсээтэ.
Улууспутугар бу сылга саҥа кэлбит кырачааны, кини төрөппүттэрин истиҥник эҕэрдэлиибит! Доруобай буоллун!
«Амма олоҕо» хаһыат.