«Эдэр дипломат-2025» өрөспүүбүлүкэтээҕи XIX күрэхтэһии улуустааҕы күрэһигэр аан дойду, дойду, Саха сирин уонна уопсастыба олоҕун анаарар бастыҥ оҕолор улуустааҕы бибилэтиэкэ ИТ саалатыгар түмүстүлэр.
Бастакы түһүмэххэ эдэр дипломаттар балаһыанньаҕа ыйыллыбыт тиэмэлэртэн талан аан дойду олоҕун ырыттылар. Иккискэ омуктуу бодоруһар сатабылларын тургутуу буолла. Үһүс түһүмэххэ дойду уонна Сахабыт сирин устуоруйатыттан ыйытыктарга хоруйдаатылар. Төрдүс түһүмэххэ талан ылбыт тиэмэлэригэр аан дойду балаһыанньатыгар уонна устуоруйатыгар бэйэлэрин санааларын эттилэр. Бэрт сэргэхтик барбыт күрэхтэһии кыттааччыларын үөрэх салалтатын методическай салаатын сэбиэдиссэйэ Семен Шадрин, иитэр үлэҕэ уонна эбии үөрэхтээһиҥҥэ исписэлиис Алтана Артемьева, улуус дьаһалтатын ыччакка уонна социальнай бэлиитикэҕэ салайааччыта Саргылана Неустроева, Амматааҕы лиссиэй омук тылыгар учуутала Виктория Шишигина, улуустааҕы бибилэтиэкэ тутаах библиограба Туйара Новикова сыаналаатылар.
Түмүккэ 5-8 кылаастарга I миэстэни Сатаҕайтан Таисия Елисеева, II миэстэни лиссэйтэн Георгий Петров, III миэстэни лиссиэйтэн Денис Петров, 9-11 кылаастарга I миэстэни Айхал Слепцов, II миэстэни лиссиэйтэн Ян Карамзин, III миэстэни Чакыртан Эдуард Новгородов ыллылар. Маны таһынан ийэ тылынан саҥарыыга Болугуртан Глеб Потапов үөрэх салалтата анал бирииһин анаата. Чаҕылхайдык кыттыбыт Сулҕаччы 11 кылааһын үөрэнээччитэ Айхал Слепцов уонна саамай кыра саастаах эдэр дипломат, Бөтүҥ орто оскуолатын 5 кылааһын үөрэнээччитэ Прокопий Егоров улуустааҕы бибилэтиэкэ анал бириистэрин туттулар. Кыайыылаахтар тохсунньу ыйга өрөспүүбүлүкэтээҕи сүүмэрдиир түһүмэххэ кыттар быраабы ыллылар.
Алтана Артемьева.