Аммаҕа улуус дьаһалтатын көҕүлээһининэн Арассыыйаҕа Дьиэ кэргэн, Саха Өрѳспүүбүлүкэтигэр Оҕо саас уонна Амма улууһугар Олоҥхо сылларын иитинэн «ДьэдьЭН» улуустааҕы дьиэ кэргэн пуорума Ф.Ф. Потапов аатынан Амматааҕы норуот айымньытын дьиэтигэр сэргэхтик ыытылынна.
Арассыыйаҕа, Саха сиригэр, Аммаҕа бэлиэ сыллар түмүктэнэн эрэллэринэн бүгүн ыытыллыбыт улуустааҕы төрөппүт пуорума интэриэһинэй уонна үтүө түмүктэрдээх буолла. Бу күн Бүтүн Арассыыйатааҕы «Блогема» бириэмийэ «Бастыҥ оҕо блогера» анал аат кыайыылааҕа эдэр блогер Айыына Кожурова бэйэтин туһунан билиһиннэрэн, Мэҥэ Хаҥалас улууhун кыраайы үѳрэтэр түмэлин салайааччыта, улуус дьокутаата Масаха Мэхээс сахалыы сахалар тустарынан, суруналыыс, блогер, «SaySaqa» бырайыак ааптара Уйгулаана Николаева оҕо аймаҕы ийэ тылынан иитии туһунан санааларын үллэһиннилэр. Оҕолор Айыыналыын туспа былаһааккаҕа эмиэ кэпсэттилэр, аквагрим оҥортордулар.
Оскуолалар төрөппүт сүбэлэрин, оскуолалар аҕа түмсүүлэрин бэрэссэдээтэллэрэ, төрөппүттэр кэлэннэр үлэлэрин-хамнастарын кэпсээбиттэрэ, билиһиннэрбиттэрэ улахан болҕомтону тарта. Ол курдук, эмистэр уол оҕону иитии хайысхаларын салгыы кэҥэтэр, сайыннарар үлэлэрин (сал. Уйгулаана Сысолятина, Альберт Соловьев), сатаҕайдар үүнэр ыччаты тыа сиригэр олохсутар, саха ыалын бэлэмниир, ийэ-аҕа буоларга иитэр тосхоллорун (сал. Марианна Дордосова, Николай Артемьев), сэргэ бэстэр биэрэги бөҕөргөтүүнэн оҕо аймаҕы айылҕа харыстабылыгар иитэр (сал. Анастасия Фомина, Альберт Фомин), чакырдар үҥкүүнэн олоҥхону туруорууга, онуоха бэлэмнэниигэ (сал. Наталия Матвеева, Айсен Николаев), болугурдар Аҕа дойду Улуу сэриитин үбүлүөйүнэн олохтоох ааптар айымньытынан дьүһүйүүнү бэлэмнээн улууспут нэһилиэктэринэн сылдьан дьоҥҥо-сэргэҕэ туруорар (сал. Любовь Потапова, Прокопий Шестаков), бөтүҥнэр ытык кэрэ, бэлиэ сирдэринэн сылдьан оҕолорго билиһиннэрэр (сал. Анжелика Никитина, Спартак Васильев), соморсуннар оскуола тыйаатырын көмөтүнэн айымньылары туруорар онуоха бэлэмнэнии үлэтин тэрийэр (сал. Елена Максимова, Михаил Трофимов), Амма 1 № -дээх оскуолата «Эрэл» патриоттуу кулууп үлэтин кэҥэтэр (сал. Петр Табунанов, Ильяс Заровняев), Амма 2 № -дээх оскуолата кыра кылаастарга тулууру тургутар бэлисипиэтинэн айан (сал. Нина Баишева, Владислав Кузьмин), лиссиэйдэр өбүгэ суолунан айан (сал. Гаянэ Петрова, Роман Алексеев), сулҕаччылар сэрии сылларын оҕолоругар анаммыт мэҥэ тааһы тупсаран оҥорууга уонна мэҥэ таас устуоруйатын билиһиннэрэр (сал. Степанида Никитина, Иосиф Стручков), абаҕалар нэһилиэктэрин үһүйээннэринэн хомуурунньугу бэлэмнээһин (сал. Юлия Яковлева, Георгий Карманов) курдук оҕону иитиигэ туһуламмыт сэргэх бырайыактарын өрө көтөҕүллэн туран үөрэ-көтө билиһиннэрдилэр.
«SaySaqa» бырайыак ааптара Уйгулаана Николаева ыыппыт квиз оонньуутугар 15 дьиэ кэргэн кытыннылар. Төрөппүттэргэ уран тарбахтаахтар, сатабыллаахтар маастар-кылаастары, араас исписэлиистэр сүбэлэрин биэрдилэр.
Пуорум түмүгүнэн оскуолаларга төрөппүт хамсааһына араас хайысхаларынан сайдан, күүһүрэн иһэрэ, элбэх ийэни, аҕаны хабара, ону тэҥэ оскуола нэһилиэги, олохтоохтору кытта биир сүбэнэн тэҥҥэ үлэлииллэрэ бэлиэтэннэ.
Алтана Артемьева