Амма улууһун олохтоохторун араас эминэн, доруобуйаҕа ананар тэриллэринэн хааччыйар 7№-дээх аптека буолар. Бу күннэргэ аптека тэриллибитэ 85 сылын бэлиэтээтэ.
“Амма улууһугар 1938 сыллаахха өрөспүүбүлүкэҕэ сэттиһинэн аптека арыллыбыта. Ол иһин 7-с аптека диэн ааттаахпыт. Быйыл аптекабыт тэриллибитэ 85 сылын, онно холбуу Ийэлэр уонна аҕам саастаахтар күннэрин барытын холбуу бэйэбит испитигэр сэмэйдик бэлиэтээтибит. Үөрүүлээх түгэнинэн биһиги бэтэрээннэрбитигэр Наталья Семеновна Кулеваҕа, Надежда Михайловна Герасимоваҕа, Альбина Михайловна Артемьеваҕа “Саха өрөспүүбүлүкэтин фармациятын бочуоттаах бэтэрээнэ” диэн аат иҥэриллибитэ буолла. Ону таһынан икки бэтэрээммит Анастасия Ивановна Стручкова, Анна Дмитриевна Кондакова “Саха өрөспүүбүлүкэтин фармацияҕа туйгуннара” бэлиэнэн наҕараадаланнылар.
Бэрт сэргэх, үчүгэй көрсүһүү биэчэрэ буолан ааста. Кэллиэгэлэрбит да талааннара сөхтөрдө. Ол курдук бэйэ оҥоһугун быыстапкатын тэрийдибит. Бары мустан көрсүспэтэхпит ыраатан, олус истиҥник кэпсэтэн, үөрэн-көтөн, дуоһуйан тарҕастыбыт. Билигин аптекаҕа 13 киһи үлэлиир. Ону таһынан Сулҕаччы, Эмис нэһилиэктэриттэн ураты нэһилиэктэргэ олохтоох фельдшердар дуогабарынан аптечнай пункт үлэлэтэллэр. Аптека муниципальнай, региональнай, федеральнай эмтэр рецептэринэн хааччыйар соҕотох тэрилтэ буолар. Хомойуох иһин билигин бэйэбит оҥорорбут тохтоон турар. Уопсайа билигин аптекаҕа 6000 араас эмп, ол иһигэр ачыкы, ортопедическай табаар, медтехника баар”, — диэн 7 №-дээх аптека сэбиэдиссэйэ Мария Артемьева сырдатта.
Эминэн-томунан хааччыйыыга өр сылларга үлэлэһэр тэрилтэбитин үбүлүөйдэринэн эҕэрдэлиибит!
“Амма олоҕо” хаһыат