Бүгүн, балаҕан ыйын 27 күнэ Саха өрөспүүбүлүкэтин Судаарыcтыбаннаһын күнэ. Бу бэлиэ күн 1990 сыллаахха Судаарыстыбаннай суверенитет туһунан Декларация ылыллыбыта, мантан ыла өрөспүүбүлүкэбит саҥа кирбиигэ үктэммитэ. Аммаҕа Судаарыстыбаннас күнэ сарсыарда эрдэттэн араас тэрээһиннэртэн саҕаланна. Ол курдук улууспут оскуолаларыгар үөрүүлээх линейка, кылаас чааһа уо.д.а. араас тэрээһиннэр ыытыллаллар.
В.В. Расторгуев аатынан Амма 2 нүөмэрдээх оскуолатыгар Судаарыстыбаннас күнүнэн Амма улууһун баһылыгын э.т. Виктор Смирников, Амма нэһилиэгин баһылыга Михаил Артемьев, оскуола дириэктэрэ Григорий Карпов оҕолору итии-истиҥ тылларынан эҕэрдэлээтилэр. Маны таһынан Арасыыйа уонна СӨ бочуоттаах тутааччыта, СӨ норуотун хаһаайыстыбатын үтүөлээх үлэһитэ, СӨ судаарыстыбаннай гражданскай сулууспатын туйгуна, Амма, Чапчылҕан нэһилиэктэрин, Амма улууһун бочуоттаах олохтооҕо Владимир Расторгуев сырдык аатыгар сүгүрүйэн туран өйдөбүнньүк бэлиэҕэ сибэкки дьөрбөтүн уурдулар.
Оттон академик Л.В. Киренскэй аатынан лиссиэйгэ Судаарыстыбаннас күнэ эмиэ үрдүк таһымнаахтык бэлиэтэннэ. Маннык үөрүүлээх бэлиэ күҥҥэ эҕэрдэ тылы Амма улууһун баһылыгын э.т. Виктор Смирников, оройуон сэбиэтин дьокутаата Гаврил Захаров, лиссиэй дириэктэрэ Дария Захарова, лиссиэй 10 «б» кылааһын үөрэнээччитэ Каролина Аллагузина, СӨ үөрэҕириитин туйгуна, РФ уопсай үөрэҕин бочуоттаах үлэһитэ, математика учуутала Мария Захарова, СӨ үтүөлээх учуутала, РФ уопсай үөрэҕин бочуоттаах үлэһитэ, нуучча тылын уонна литэрэтиирэтин учуутала Любовь Шилова эттилэр.
Бэлиэ түгэҥҥэ СӨ норуотун хаһаайыстыбатын үтүөлээх үлэһитэ, СӨ социальнай сулууспатын туйгуна, СӨ социальнай сулууспатын бэтэрээнэ, Амма улууһун бочуоттаах олохтооҕо Светлана Николаева уонна тыыл бэтэрээнэ, Саха АССР оскуолатын үтүөлээх учуутала, РСФСР норуотун үөрэҕириитин туйгуна, Амма улууһун бочуоттаах олохтооҕо Мария Широких сырдык үтүө ааттарын истиҥ тылынан ахтан-санаан аастылар. Оскуола үөрэнээччилэрэ, учууталлар уонна ыалдьыттар үтүө дьон сырдык ааттарыгар сүгүрүйэн туран өйдөбүнньүк бэлиэҕэ сибэкки дьөрбөтүн уурдулар.
Артем ОСИПОВ