В.Г. Короленко аатынан Амма 1 нүөмэрдээх оскуолатыгар эмчит идэтигэр туһаайар кылаас арыллыытын тэрээһинэ буолан ааста.
«Медицинэ кылааһа биһиги оскуолабытыгар урукку сылларга баар этэ. Ол түмүгэр билигин бу оскуола выпускниктара эмчит идэтин талан бэйэлэрин да улуустарыгар, өрөспүүбүлүкэбит араас муннуктарыгар үлэлии-хамсыы сылдьаллар. Оччолорго оҕо да ахсаана элбэҕэ. Онтон икки оскуоланан тарҕанан оҕо үөрэнээччи аҕыйаан үс үөрэтэр хайысха хаалбыта: гуманитарнай, естественнэй, физико-математическай хайысхалар. Ол гынан баран билигин «Химия и лекарства», «Основы медицины» курдук факультативтар үлэлээн, ону сэргэ биология, химия предметтэрин дириҥэтэн үөрэтии баар буолан, холобура быйылгы выпускниктартан элбэх оҕо эмчит идэтин талан үөрэххэ киирэн үөрэнэ сылдьаллар. Маны сэргэ үлэ ырыынагын үөрэтэн көрбүппүт. Онно көрдөхпүтүнэ, ордук чуолаан биһиэхэ доруобуйа харыстабылын эйгэтигэр быраастан саҕалаан орто медицинскэй персоналга тиийэ кадрдар тиийбэттэр эбит. Бу ордук ковид ыарыытын кэнниттэн көстөр. Бу ыарыы медицинэни ковидка диэри уонна ковид кэнниттэн диэн икки аҥы араартаата диэххэ сөп. Итини таһынан оҕолорбут үрдүк хамнастаах, олохторугар бигэ тирэхтээх буолалларын туһугар учууталлар кыһаллабыт буоллаҕа. Ону кытта медик идэтэ наһаа наадалаах идэ буолар. Тоҕо диэтэр доруобуйа диэн бу биһиги баар суох баайбыт буолар.
Медицинскэй кылааспытыгар 22 оҕо үөрэниэхтээх. Дьокуускайдааҕы медколледжы кытта бииргэ үлэлэһэргэ дуогабардаахпыт. Ол быһыытынан орто медицинскэй персоналга, косметологка, маникюр маастарыгар уонна ыарыһаҕы көрүүгэ-истиигэ үлэһит идэлэригэр оҕолор үөрэнэн тахсыахтаахтар. Идэ ылбыттттарын туһунан туоһу сурук тутуохтаахтар. Оҕолору уопуттаах, дириҥ билиилээх учууталлар үөрэтиэхтэрэ. Холобура, Арассыыйа үөрэҕириитин бочуоттаах үлэһитэ Любовь Коммунаровна Иванова, эрчимнээх, уопуттаах Вера Ивановна Сивцева, элбэҕи эрэнэр учууталбыт, бэйэбит выпускникпыт Тамара Ивановна Алексеева. Кабинеттарбыт да хааччыллыылаахтар. Өссө эбии сайыннарыахпыт. Маныаха биһиэхэ үөрэхпит салаата, киин балыыһа да өйүүллэрин биллэрбиттэрэ, бииргэ үлэлэһэргэ бэлэмнэр», — диэн Амма 1 нүөмэрдээх оскуолатын дириэктэрэ Юрий Шишигин билиһиннэрдэ.
Үөрүүлээх аһыллыыга улуустааҕы үөрэх салаатын салайааччыта Николай Ларионов, Амматааҕы киин балыыһа кылаабынай бырааһа Михаил Архипов, билигин эмчит идэтин талан үлэлии сылдьар выпускниктар, төрөппүттэр уонна медицинэ кылааһын үөрэнээччилэрэ кыттыыны ылан, бэркэ сүргэлэрэ көтөҕүллэн сүрэхтэнии тэрээһинэ ааста.
«Амма олоҕо» хаһыат