Дьокуускай куоракка үгэскэ кубулуйбут “Ас-үөл дьаарбаҥката -2024” биэс күн устата ыытыллынна. Бу бэйэ бородууксуйатын оҥорон таһаарар үлэһит дьон үлэтин киэҥ эйгэҕэ таһаарар, билиһиннэрэр, сыаналыыр тэрээһинигэр Амма улууһуттан оҥорон таһаарааччыларбыт ситиһиилээхтик кытыннылар.
“Быйылгы дьаарбаҥка уратыта диэн урукку курдук улуустан киирэн араас музыкальнай нүөмэр диэн көрдөрүүтэ, ону сэргэ улуустарынан миэстэлэһии диэн суох буолла. Ол оннугар биирдиилээн хаһаайыстыбалар, ас-үөл оҥорон таһаарар урбаанньыттар кытыннылар. Биһиги улуустан бааһынай хаһаайыстыбалартан Бөтүҥтэн Полина Петровна Иванова баһылыктаах “Чолбон” хаһаайыстыба дьиэ кэргэн бааһынай хаһаайыстыбаларын ортотугар бочуоттаах иккис миэстэни ылан үөрдүбүт.
Итини сэргэ дьаарбаҥкаҕа ыҥырыа мүөтүнэн дьарыктанааччыларбыт Эльвира Пестерева, Марат Залялов уонна Мээндигиттэн Татьяна Яковлева кыттан ыҥырыаттан бородууксуйаларын атыылаатылар. “Амма” СППК быйыл эттэн бородууксуйанан кыттыбата. Ол оннугар үүттэн оҥорор бородууксуйатын аҕалан атыыга таһааран дьон олус сөбүлээн ыллылар. Дьаарбаҥка түмүгүнэн соҕотуопкалыыр тэрилтэбит түөрт дипломунан наҕараадаланнылар. Ол курдук ынах арыытыгар, ыраас ууга, барыанньаҕа уонна сир аһыттан сиропка дипломнары туттулар.
Маны таһынан быйыл аан бастакытын Амматтан “Мясная лавка» диэн Михаил Терентьев салайааччылаах тэрилтэ ыыһаммыт убаһа этин, эттэн араас бородууксуйаларын аҕалбытын барытын атыылаата. Ону тэҥэ Амма бурдугун, онтон оҥоһуллубут лэппиэскэтин Майя Олесова тэрилтэтэ аҕалбыт.
Атыылаһааччылар эмиэ бэркэ сэҥээрэн ыллылар, саламаатын астына боруобалаатылар. Дьаарбаҥкаҕа эмиэ хаһыс да сылын агрооскуолалар кыттыыны ылаллар. Быйыл биһигиттэн Абаҕа уонна Бөтүҥ оскуолалара киирэн кытыннылар. Аммалар бородууксуйаларын өрөспүүбүлүкэ Бырабыыталыстыбатын бэрэссэдээтэлин солбуйааччы Сергей Местников, тыа хаһаайыстыбатын миниистирин солбуйааччы Николай Афанасьев, Департамент бэрэстэбиитэллэрэ кэлэн көрдүлэр, сыаналаатылар. Мин бу үс күннээх дьаарбаҥкаҕа киирэн кыттыбыт бары дьоммутугар дириҥ махталбын тириэрдэбин”, — диэн Амма улууһун тыатын хаһаайыстыбатын управлениетын салайааччы Ион Кононов санаатын үллэһиннэ.
“Амма олоҕо” хаһыат