Улуу Новгород куоракка XV Бүтүн Арассыыйатааҕы “Вместе ради детей! Вместе год семьи!” диэн форум ыытылла турар. Саха сирин дэлэгээссийэтин СӨ Үлэ уонна социальнай сайдыы миниистирэ Елена Волкова салайар. Бу форумҥа дэлэгээссийэ састаабыгар киирэн Амма улууһун баһылыгын социальнай эйгэҕэ солбуйааччы Ньургуйаана Илларионова уонна Амматааҕы биир кэлим социальнай киин социальнай үлэҕэ исписэлииһэ Сайаана Сергиенко кытта сылдьаллар.
“Бүгүн форум үөрүүлээх аһыллыыта, пресс-конференция, анал туспа тиэмэлэрдээх былаһааккаларынан тыырыллан үлэлээһиннэр былааннаналлар. Форум «Валдай» научнай киинҥэ киэҥ хабааннаахтык ыытыллар. Гордеева фондатын 1 мөл. 400 тыһ. Гранын кыайан Амма улууһугар «Перспективы» («Кэскил») оҕолор сокуону кэһэллэрин аҕыйатыы, сэрэтии үлэтин биир кэлимник ыытар сыаллаах- соруктаах тэриллибитэ биһирэнэн бу бүтүн Россиятааҕы форумҥа кэлэн Аммабыт үлэтин уопутун билсиһиннэрэбит, кэпсиибит. Онон долгуйабыт уонна үөрэбит. Түгэнинэн туһанан бу Граны суруйан, көмүскээн, көдьүүстээхтик үлэтэ сылдьар Евдокия Александрова салайааччылаах дьиэ кэргэҥҥэ уонна оҕоҕо социальнай өҥөнү оҥорор отделения бары үлэһиттэригэр махталбын тириэрдэбин. Салгыы форум үлэтин сырдатан иһиэхпит”, — диэн Ньургуйаана Ивановна төлөпүөнүнэн билиһиннэрдэ.
“Амма олоҕо” хаһыат