«Созвездие» киинэ саалатыгар Амма улууһун баһылыгын социальнай боппуруостарга солбуйааччы Нюргуяна Илларионова, Амма улууһун киинэ артыыстарын общественнай холбоһуктарын, О.П. Иванова-Сидоркевич аатынан оҕо айымньытын киинин тэрээһининэн Амма оскуолаларын социальнай педагогтарын, Амма психологическай кииннэрин, социальнай сулууспа үлэһиттэрин кытары Дмитрий Давыдов «Чума» киинэтин тула сэһэргэһии, кэпсэтии буолан ааста.
Кэпсэтиигэ Амма улууһун баһылыгын социальнай боппуруостарыгар солбуйааччы Нюргуяна Илларионова модератор уонна режиссер Дмитрий Давидов спикер быһыытынан кыттыыны ыллылар. Киинэни көрүү кэнниттэн араас ыйытыылар киирдилэр, ырытыһыы, сүбэлэһии буолла. Дмитрий Леонидович киинэтин туох сыаллааҕын, туох санааттан уһуллубутун быһаарда, кэпсээтэ, сорох түгэннэргэ сүбэ да биэрэрдии эппиэттээтэ. Түмүккэ кэпсэтии кыттыылаахтара Дмитрий Давыдовка өссө да инникитигэр таһаарыылаах үлэни уонна сырдык, сэргэх киинэлэри устарыгар баҕа санааларын эттилэр.
-Киинэҕэ уол оҕо улаатар сааһыгар аҕатынаан өйдөспөт буолуулара, аҥардас аҕалар проблемалара арылхайдык көстөр. Бу проблема билиҥҥи олоххо да баар суол, инникитин общественность, оскуола, төрөппүт бииргэ түмсэн маннык проблеманы ырытыһан, оҕо төрөппүт сыһыаныгар араас кэккэ тэрээһиннэри ыытыахтарын сөп,- диэн санаалаах кэпсэтии кыттыылаахтара тарҕастылар.
Анал көрдөрүү түмүгүнэн Амма улууһун баһылыгын социальнай боппуруостарга солбуйааччы Нюргуяна Илларионова, режиссёр Дмитрий Давыдов буолан, мантан ыла итинник дириҥ ис хоһоонноох киинэлэри (социальнай, спортивнай, мистикалаах уо. д.а.) интэриэстээх идэлээхтэри кытары ити курдук кэпсэтиилээх, сэһэргэһиилээх тэрээһиннэри булгуччу оҥоруохха наадатын бэлиэтээтибит.
Анатолий Стручков, Амма улууһун киинэ артыыстарын общественнай холбоһуктарын салайааччыта.