Бүгүн Дьокуускай куоракка “Өрөгөй” спортивнай комплекска аан бастакытын СӨ многоборье Федерациятын Кубогар хамаанданан күрэх ыытылынна. Барыта 8 улуустан ааттаах-суоллаах спортсменнар кэлэн улуустарын чиэһин көмүскээтилэр.
“Быйыл аан бастакытын многоборье Федерацията маннык хамаанданан күрэҕи ыытта. Урукку өртүгэр биирдиилээн киирсии буолар этэ. Барыта аҕыс улуус күөн көрүстэ. Кэбээйи, Бүлүү, Уус Алдан, Мэҥэ Хаҥалас, Таатта, Нам, Амма, Чурапчы улуустарыттан бастыҥ спортсмен уолаттарбыт биэс көрүҥҥэ кииристилэр. Биһиги улуус аатын Тимофей Большаков, Леонид Филиппов уонна Дмитрий Шестаков көмүскээтилэр. Түмүккэ үс төгүл үскэ 5-с, тутум эргииргэ 2-с, хапсаҕайга 4-с, мас тардыһыытыгар 3-с уонна сүүрүүгэ 1-кы миэстэни ылан Амма улууһа иккис бириистээх миэстэни ыллыбыт.
Бастакы миэстэҕэ Кэбээйи уонна үһүс миэстэҕэ Мэҥэ Хаҥалас улуустара таҕыстылар. Манна кыайыылаах 300 000, иккис миэстэлээх 200 000 уонна үһүс миэстэ 100 000 солкуобай уу харчынан наҕараадаланар сертификаты тутта. Уолаттарбытыгар устудьуоннар түмсүүлэрэ кэлэн күүстээхтик “ыарыйда”. Улууспут баһылыга Степан Николаевич Кузьмин кэлэн эҕэрдэлээтэ. Улуустарын көмүскүүр хамаанда уолаттарыгар биир дойдулаахпыт “ОкнаСтандарт” ХЭТ салайааччыта Альберт Окороков формаларын спонсордаан биэрбитигэр махталбытын тириэрдэбит. Бу күн улууспут чиэһин көмүскүүр Борис Сдвижковка многоборьеҕа Саха өрөспүүбүлүкэтин маастара буолбутун туоһулуур дастабырыанньаны туттардылар.
Онон киниэхэ истиҥ эҕэрдэбитин тириэрдэбит. Бары спортсмен уолаттарбытын ситиһиилэринэн эҕэрдэлиибит, өссө да кыайыылары баҕарабыт”,- диэн Амма улууһун спортка управлениетын салайааччыта Дмитрий Наумов сырдатта.
Салгыы улуустар миэстэлэрин этэр буоллахха, 4-с миэстэ Чурапчы, 5-с миэстэ Нам, 6-с миэстэ Уус Алдан, 7-с миэстэ Бүлүү уонна 8-с миэстэ Таатта улуустара буоллулар.
“Амма олоҕо” хаһыат