Төрөөбүт түөлбэтин сэһэнин киистэҕэ түһэрэр айылҕаттан талааннаах худуоһунньук Николай Рязанскай өрөспүүбүлүкэ киин куоратын килбэйэр киинигэр «Үргэл» арт-галереяҕа «Кустук тахсар Аммабар» айар быыстапкатын үөрүүлээх аһыллыыта буолла. Үөрүүлээх түгэнинэн Россия уонна Саха өрөспүүбүлүкэтин худуоһунньуктарын айар сойууһун чилиэнин биир дойдулаахтара, идэлээхтэрэ эҕэрдэлээтилэр.
Амма улууһун, Сулҕаччы нэһилиэгин бочуоттаах олохтооҕо, СӨ култууратын туйгуна Николай Николаевич Рязанскай дойдутун мааны айылҕатын, дьонун-сэргэтин, айылҕа араас кэмин дьүһүйбүт хартыыналара Россияҕа, Саха сиригэр улахан биһирэбили ылаллар. Кини тыа сирин үлэһит дьонун, күннээҕи түбүгүн, дьоллоох оҕо саас күннээх күлүм түгэннэрин холустаҕа түһэрэр туспа суоллаах-иистээх худуоһунньук. Ол даҕаны иһин буолуо, хас биирдии киһи кини үлэлэригэр бэйэтин, чугас дьонун, ыалларын даҕаны билэр курдук. Оннук хас биирдии саха киһитигэр чугастар.
Николай Николаевиһы бу долгутуулаах күнүнэн «Үргэл» арт-галерея дириэктэрэ, Россия үтүөлээх, саха норуодунай худуоһунньуга Юрий Спиридонов, Дьокуускай куорат уокуруктааҕы норуот айымньытын киинин методическай үлэҕэ дириэктэр солбуйааччыта, СӨ култууратын туйгуна Ньургуйаана Ушницкая, национальнйа художественнай мусуой искусствоведа, Россия уонна СӨ үтүөлээх диэйэтэлэ Ася Габышева, СӨ худуоһунньуктарын сойууһун бэрэссэдээтэлин солбуйааччы Наталья Николаева, Амма улууһун баһылыгын солбуйааччы Ньургуйаана Илларионова, саха норуодунай суруйааччыта Дмитрий Наумов, поэтесса Саргылана Гольдерова — Саргы Куо, Сулҕаччы нэһилиэгин баһылыгын солбуйааччы Василий Неустроев, онтон даҕаны атыттар эҕэрдэлээтилэр, өссө элбэх айымньылаах үлэни, үгүс быыстапкалары баҕардылар. Итиэннэ айар суолун булуммут, туспа буочардаах, көрүүлээх, кэтэһэр сүгүрүйээччилэрдээх айар үлэһит күн сирин көрбүт күнүнэн уруйдаан уһун, көнө суоллаах олоҕу түстээтилэр. Маннык үтүө күннэрэ үксүү туралларыгар, маннык мааны кэмнэрэ салҕанан иһэллэригэр, хатыламмат түгэннэри хартыынатыгар хатаан, холустатыгар тиһэн бар дьонугар тиэрдэ турарыгар алгыс маанытын анаатылар.
Николай Рязанскай «Кустук тахсар Аммабар» айар быыстапката «Үргэл» арт-галереяҕа олунньу 28 чыыһылатыгар диэри туруоҕа. «Пушкинскай картанан» киириэххэ сөп.
«Амма олоҕо» хаһыат.