Бүгүн Дьокуускай куоракка Өрөспүүбүлүкэ Судаарыстыбаннаһын күнүн көрсө Ил Дархан Айсен Николаев судаарыстыбаннай наҕараадалары туттарда. Үрдүк наҕараадалары туппут дьон ортотугар аммалар эмиэ бааллар. Кинилэр кимнээҕий?
Үгэс быһыытынан өрөспүүбүлүкэбит биир ураты суолталаах күнүгэр бастыҥ үлэлээх, социальнай-экномическай сайдыыга тус кылааттарын киллэриигэ үтүөлээх дьону бэлиэтиир үтүө үгэс олохтоммута. Ол курдук Ил Дархан Айсен Николаев удьуор уус, ыччаты бу уустук идэҕэ уһуйар, өр сыл Чапчылҕан орто оскуолатыгар үлэ уруогун учууталынан үлэлээбит Игнатий Устиновка “Гражданскай килбиэн” уонна 30-тан тахса сыл устата улуустааҕы кииннэммит балыыһаҕа гинеколог бырааһынан үлэлиир Евдокия Долгуноваҕа “Арассыыйа үтүөлээх бырааһа” бэлиэлэри туттарда.
“Биһиги биир киэн туттар бырааспыт, өр сылларга төрүүр отделение сэбиэдиссэйинэн айымньылаахтык үлэлиир Евдокия Степановна Долгунова өр сыллаах үлэтэ сыаналанан Арассыыйа үтүөлээх бырааһа буолбутунан өссө төгүл истиҥник эҕэрдэлиибит. Кини бу үлэлиир кэмигэр элбэх саҥаны киллэрэн, бырагыраамалары суруйан, улууска оҕо төрөөһүнүн үрдүк таһымҥа таһаарбыта. Онон бу Судаарыстыбаннас күнүн көрсө Евдокия Степановна Арассыыйа Бэрэсидьиэнэ Владимир Путин илии баттааһыннаах дастабырыанньаны кытта бэлиэни ылбытынан өссө төгүл бары эмчиттэр ааттарыттан эҕэрдэлиибин”, — диэн бу тэрээһиҥҥэ тэҥҥэ сылдьыбыт улуус киин балыыһатын кылаабынай бырааһа Михаил Архипов үөрүүтүн тириэрдэр.
Бу үөрүүлээх түгэҥҥэ Амма улууһун уустарын түмсүүтүн салайааччыта, улуустааҕы кииннэммит бухгалтерия салайааччыта Роман Алексеев эмиэ сырытта, кэллиэгэтин үөрүүтүн үллэһиннэ.
“Игнатий Александрович Чапчылҕан оскуолатыгар үлэлиир сылларыгар уус кыһатын киллэрбит киһи буолар. Манна кини 20-тэн тахса сыл үлэлээбитэ. Кини кэллиэгэтэ Михаил Викторович Михайловы кытта оҕолору маска уонна тимиринэн уһанарга туох баар билиилэрин, сыраларын уурбут дьон буолаллар. Хантан да улахан көмөнү ылбакка, ис дууһаларыттан ылсан бу дьыалаларын саҕалаабыттара. Игнатий Александрович оҕолорго уус былыргы үгэстэрин көрдөрөн, үөрэтэн, билигин оҕолор бу дьыаланан үлүһүйэн туран дьарыктаналлар. Кини 1994 сыллаахха бырагыраама суруйан, тимиринэн уһаныы үлэ уруогун быһыытынан киирэн күн бүгүҥҥэ диэри үлэлии турар. Ол эбэтэр бу оскуолаҕа 5-с кылаастан 11-с кылааска диэри үөрэнэн, 2-с разрядтаах тимир ууһун аатын ылар кыахтаахтар. Ол курдук Игнатий Александрович Амма улууһугар уус тыынын иҥэрбит, уол оҕону иитиигэ улахан кылааттаах киһи буолар. Онон мин кинини ис сүрэхтэн бу үрдүк наҕараадатынан истиҥник эҕэрдэлиибин. Биһиги кинини кытта тэҥҥэ үөрэбит уонна ылыахтаах киһи ылла диэн сыаналыыбыт. Өссө бу күн Амматтан Евдокия Степановна Долгунова эмиэ Арассыыйа үтүөлээх бырааһа диэн үрдүк бэлиэни тутта. Онон кинини эмиэ истиҥник эҕэрдэлиибин”, — диэн Роман Александрович санаатын этэр.
“Амма олоҕо” хаһыат