Амманы ааттаппыт бастыҥ дьоммут чиэстэннилэр

Саха Өрөспүүбүлүкэтин күнүгэр «Амманы ааттаппыт бастыҥ дьоммут» диэн улууспутугар аан бастакытын ыытыллар бэрт истиҥ иэйиилээх дьоро тэрээһин буолан ааста. Манна тапталлаах Аммабытын тус ситиһиилэринэн өрөспүүбүлүкэҕэ дорҕоонноохтук аатырдыбыт, кыайыылаах-хотулаах тахсан үгүс үөрүүнү бэлэхтээбит дьоммут «Алгыс» сынньалаҥ кииҥҥэ ыҥырыллан чиэстэннилэр-бочуоттаннылар.

Онуоха улуус баһылыгын социальнай боппуруостарга солбуйааччы Нюргуяна Илларионова хас биирдии кыайыылааҕы сиһилии билиһиннэрэн, кинилэртэн маннык улахан ситиһии хайдах кэлбитин ыйыталаһан үөрүүлээх мунньах бэрт чэпчэкитик, сэргэхтик ааста.
Манна бааллар “Далбар Хотун — 2024” күөн күрэс кыайыылааҕа Саргылана Рожина, “Аҕа күрэҕин” кыайыылаахтара Федоровтар дьиэ кэргэн, “Битва режиссеров” Гран-при буолбут Валерий Лобанов, “Директор года” куонкурус лауреата Григорий Карпов, өрөспүүбүлүкэ бастыҥ анестезиолог бырааһа Петр Табунанов, сүһүөхтэринэн хааччахтаахтарга олорон эрэ волейболга өрөспүүбүлүкэ чемпиона Никита Лобанов, «Муус устар»  фестиваль көрөөччүлэр куоластааһыннарын кыайыылааҕа Николай Нестерев, соҕотох аҕаларга аналлаах күөн күрэс призера Александр Павлов уолаттарынаан, илин эҥэр эдэр педагогтарын икки ардыларыгар күрэх кыайыылааҕа Егор Никифоров бааллар.
Бу күн биир долгутуулаах түгэнинэн Амма улууһун баһылыга Степан Кузьмин улуус социальнай-экономическай сайдыытыгар тус кылааттарын киллэрбит биир дойдулаахтарбытыгар үрүҥ көмүс бэлиэлээх «Амма улууһун бочуоттаах олохтооҕо» үрдүк ааттары иҥэрдэ. Ол курдук, энергетика, энергетическай тутуу уонна үлэ бэтэрээнэ, Илин энергосистематын бочуоттаах үлэһитэ, Амма нэһилиэгин бочуоттаах олохтооҕо Анатолий Алексеевка, педагогическай үлэ уонна үлэ бэтэрээнэ, Саха Өрөспүүбүлүкэтин норуотун үөрэҕириитин туйгуна, «Арассыыйа ийэлэрэ» Бүтүн Арассыыйатааҕы уопсастыбаннай хамсааһын Саха сиринээҕи эрэгийиэнин Амматааҕы салаатын чилиэнэ, «Үлэ аргыстаах эдэр саас» бырайыак сүрүннээччитэ Галина Бочугуроваҕа, Саха Өрөспүүбүлүкэтин олох-дьаһах коммунальнай хаһаайыстыбатын бочуоттаах үлэһитэ, Амма нэһилиэгин бочуоттаах олохтооҕо Надежда Садовниковаҕа, Саха Ѳрөспүүбүлүкэтин култууратын үтүөлээх үлэһитэ, Саха Ѳрөспүүбүлүкэтин култууратын уонна муниципальнай сулууспатын туйгуна Евдокия Сутаковаҕа, урбаанньыт, Сэбиэскэй потребительскай кооперация туйгуна, Саха Ѳрөспүүбүлүкэтин потребительскай кооперациятын бочуоттаах үлэһитэ, Амма нэһилиэгин бочуоттаах олохтооҕо Ксения Пестереваҕа, «СахаСпецТранс» хааччахтаммыт эппиэтинэстээх уопсастыба суоппара, Саха Ѳрөспүүбүлүкэтин автомобильнай транспорын бочуоттаах үлэһитэ, Саха Өрөспүүбүлүкэтин олох-дьаһах коммунальнай хаһаайыстыбатын бэтэрээнэ уонна бочуоттаах үлэһитэ, Амма нэһилиэгин бочуоттаах олохтооҕо Семен Терентьевка үөрүүлээх быһыыга-майгыга иҥэрилиннэ.

Маны таһынан спорт кыһыҥҥы көрүҥнэригэр Саха сирин V спартакиадатыгар кыттыбыт спортсменнары көдьүүстээхтик бэлэмнээбит, Амма улууһун физическэй култууратын уонна спордун сайдыытыгар кылааттарын иһин Амма улууһун баһылыгын Махталынан Н. Захаров-Сахаачча аатынан Амматааҕы оҕо спортивнай оскуолатын старшай тренерэ Алексей Бурнашев уонна тренер Александр Стручков бэлиэтэннилэр. Маны сэргэ спорт кыһыҥҥы көрүҥнэригэр Саха сирин V спартакиадатыгар кыттыыга көмөлөрүн уонна өйөбүллэрин иһин Амма улууһун дьаһалтатын Махтал суругун В.Г. Короленко аатынан Амма 1 №-дээх орто оскуола суоппара Владимир Куприянов, Амма киин балыыһатын педиатр-бырааһа Сандаар Максимов уонна кыһыҥҥы многоборьеҕа Амма улууһун хамаандатын эппиэттээх тренерэ Илья Тимофеев туттулар.


Салгыы биатлон күрэҕин кыайыылааҕа Николай Максимов 80 тыһыынча солкуобай, хайыһарынан сырсыыга уонна сприҥҥэ сүүрдүүгэ үрүҥ көмүс призер Никита Шестаков 120 тыһыынча солкуобай, юниордарга спортивнай ориентированиеҕа үрүҥ көмүс призера Марисса Уварова уонна хайаттан хайыһарынан түһүүгэ (сэргэ слалга) боруонса призер Гаврил Макаров 40-нүү тыһыынча солкуобай, хайаттан хайыһарынан түһүүгэ (сэргэ уонна анал слалга) боруонса призер Артем Филатов уонна юниордарга сноубордка (слалом и борд кросска) боруонса призер Анастасия Иванова 80-нуу тыһыынча солкуобай суумалаах сэртипикээттэри тутаннар өрөгөйдөрө үрдээтэ. Спортсменнары бэлэмнээбит бары тренердэргэ 20-лии тыһыынча солкуобай суумалаах сэртипикээттэри туттардылар.

Вера Иванова.

Читайте дальше