Амма Наахара тимуровецтара

Улуу Элиэнньин төрөөбүт күнүн көрсө Амма Наахара орто оскуолатын 5-11-с кылаас үөрэнээччилэрэ кылаастарын салайааччыларын кытары аҕам саастаах ыалларга сыллата тимуровскай көмөнү оҥорон  үөрдэллэр, үөрэх кэнниттэн түмсэн үлэ бөҕө үмүрүтэллэр. Бу кэмнэргэ үлэ-хамнас күөстүү оргуйан урукку кэм субуотунньуктарын санатар.

Иитэр үлэҕэ дириэктэри солбуйааччы Марина Макарова көҕүлээһининэн быйыл 7 кылаастар Людмила Александрова салайааччылаах аан маҥнай Мария Александровна Яковлева дьиэтин тула хаарын ыраастаан, таспыттара. Мария Яковлева, Алена Мартынова салайар 5-6-с кылаас үөрэнээччилэрэ Прасковья Полуэктовна Никифороваҕа мас сыыһын уонна сылгы сааҕын ыраастаабыттара. Елена Кузьмина салайар 8-с кылааһын үөрэнээччилэрэ Мария Петровна Устиноваҕа мас сааһылаатылар. Петр Алексеев, Анастасия Пахомова, Михаил Романов салайар 9-10-11 кылаас үөрэнээччилэрэ Ольга Андреевна Гуляеваҕа, Степан Степанович Гаврильев мас хайытан сааһылаатылар. Оҕолор күннэрин туһалаахтык атаардылар, наһаа үчүгэйдик үлэлээн аҕа саастаах дьонтон махтал тыллары, алгыс бастыҥын истэн онтон бэйэлэрэ үөрдүлэр.

Үтүө үгэһи оройуттан тутар үөрэнээччилэр кылаас салайааччыларын кытары тэҥҥэ сылдьан төрөөбүт дойдуга бэриниилээх буолуу тыыныгар сайдаллар, сибиэһэй салгынынан тыыналлар, үлэҕэ уһуйуллан аттыгар баар дьоннорго эрэл санааны, махталлаах буолууну үөскэтэллэр. Бу ис сүрэхтэн ыытыллар көмөҕө оҕолор киһиэхэ үөрүү күүһүн биэрэллэрин илэ көрөллөр, үтүөҕэ баҕараллар. Сылаас сырдык сыһыан сыдьаайа өрүү эйэҕэс — элэккэй эйгэни үөскэттин, олох олорууга үлэттэн дуоһуйуу бастакы укулаата ууруллан кэнчээри ыччаппыт көхтөөх, эйэлээх буола иитиллэн биир санааҕа салайтаран бу мин нэһилиэгим, улууһум, дойдум туһугар диэн тыыҥҥа өрүү иитиллэ турдун!

Ирина Корякина — Олесова.

Читайте дальше