2022 сыллаахха О.П. Иванова-Сидоркевич аатынан оҕо айар, сайдар киинин исписэлиистэрэ, чуолаан дириэктэри иитэр-үөрэтэр үлэҕэ солбуйааччы Феврония Данилова, методистар Александра Егорова уонна Вероника Давыдова уол оҕону тыа сирин үлэтигэр-хамнаһыгар сыһыарар, тыа хаһаайыстыбатын инникитин түстүүр, төрөөбүт нэһилиэктэрин сирин-уотун билэр, сир эдэр хаһаайыттара буолан тахсалларын ситиһээри «Дьөһөгөй» сылгыны таптааччылар кулууптарын Амма, Бөтүҥ, Сатаҕай нэһилиэктэригэр тэрийэннэр биир сыл устата ситиһиилээхтик үлэлээбиттэрэ. Бу бырайыактарын быйыл сайыннаран, кэҥэтэн Арассыыйа Бэрэсидьиэнин граныгар кыттан 1 999 000 суумалаах сэртипикээтинэн бэлиэтэннилэр.
Бырайыакпытын «Амма кэскилэ» коммерческайа суох тэрилтэ нөҥүө суруйан кытынныбыт. Аны күһүн бу кулууптарбытын Амма, Абаҕа, Алтан, Болугур, Сатаҕай, Чакыр оскуолаларын базаларыгар арыйан үлэлэтиэхпит. Манна 70 уол оҕо сылгы мэччирэҥ сирдэрин, ходуһалары үөрэтэр сыаллаах-соруктаах наукаҕа олоҕуран, чинчийэр үлэлэрин саҕалыахтара. Кинилэргэ Арктическайдааҕы Судаарыстыбаннай агротехнологическай университет преподавателлэрэ, учуонайдара сүбэ-ама биэриэхтэрэ, химия, биология, география учууталлара салайааччынан үлэлиэхтэрэ. Сылгы иитиитинэн дьарыктанар ыал аҕалара сылгыны иитии ньымаларыгар уһуйуохтара, үөрэтиэхтэрэ.
Маны таһынан сыл устата сэттэ тэрээһин ыытыллыаҕа. Научнай үлэ туһунан кэпсиир семинар, мэччирэҥ сирдэргэ, сылгы базаларыгар тахсыы, наукаҕа бастакы хардыыларын түмүгүнэн оҥоһуллубут үлэлэрин туһунан иһитиннэриилэри кылаас чаастарыгар, төрөппүт мунньаҕар сэһэргиэхтэрэ. Бырайыак түмүгэр «Сир эдэр хаһаайыттара» диэн научнай-практическай конференция ыытыллыаҕа. Бырайыакпыт Фонд үбүлээһининэн олоххо киирэн, тыа хаһаайыстыбата сайдыытыгар сэмэй кылаатын киллэриэ диэн эрэнэбит, — диэн Александра Егоровна иһитиннэрдэ.
Вера ИВАНОВА
