Амма нэһилиэгин олохтооҕо, оҕолорго анаан хоһооннору, бэлиэ түгэннэргэ анабыл хоһооннору табан суруйар айар куттаах Дария Васильева — Амма Даайыс Узбекистан өрөспүүбүлүкэтигэр ыытыллыбыт мас тардыһыытыгар аан дойду чемпионатын кыайыылаахтарыгар Баишевтар дьиэ кэргэттэригэр бэйэтин анабыл хоһоонун суруйда.
БААЙЫҺАПТАР, АММАЛАР!
Дьэ дуо диэххэ,
Хоһооҥҥо холонуохха,
Үтүө сураҕы туппучча,
Үөрэн-көтөн турбучча!
-Этиҥ эрэ,доҕоттоор,
Аймах-билэ да дьонноор!
Ити тугу кэпсииллэр,
Кимнээхтэри этэллэр
Аан дойдуну аймаатылар диэн,
Саха аатын самныбат
Саргылаатылар диэн? —
Эппиэт онуоха маннык эбит:
-Эчи даҕаны,кимнээх буолуой?!
Биир дьиэ кэргэн —
БААЙЫҺАПТАР, АММАЛАР!
Аҕалара — Анатолий,
Уоланнара — Егордара,
Кыысчааннара,кыралара —
Талба-мааны Таанньалара! —
—Ээ,өйдөөтүм,Аммалар,
Мас тардыһыы маастардара —
Мадьынылар —
БААЙЫҺАПТАР!
Бөҕө-таҕа көрүҥнээхтэр,
Күүстээх дьоннор—
БААЙЫҺАПТАР!
Били-били,биллиилээхтэр —
Дьоруолатан айаннатар
Дьоһуннаахай боруода
Дьоролдьуспут
Аттардаахтар,
Сүүрүк сылгыны баайааччылар —
АММАЛАР,
БААЙЫҺАПТАР!
Аны туран,
Аан дойдуга
Тэҥнээхтэрин булбатахтар,
Араас омук ааттаахтара
Маһы былдьаан ылаарылар
Маччарыһа сатаабыттар,
Биһиэннэрэ,саараама,мастарын биэрбэтэхтэр,
Бэйэбит киэнэ диэбиттэр,
Илдьитэлии кэлбиттэр!
МАС ТАРДЫҺЫЫ — ӨБҮГЭ КҮҮҺЭ,
САХА БУОЛУУ КҮЛҮҮҺЭ!
ӨССӨ ТӨГҮЛ ӨЙДӨТТҮЛЭР
ОНУ ААТТААХ МАДЬЫНЫЛАР —
ААН ДОЙДУГА ҮҺҮӨН БАСТААБЫТ
БААЙЫҺАПТАР,
АММАЛАР!
Саха баарын тухары
Саппаҕырбат саҕахтар
Сарыал сырдык уотунан
Сандаарыһа турдуннар!
Саха сирэ бүттүүнэ
Үөрэ, сөҕө-махтайа
Солун бэрдин иһиттэ,
Сүҥкэн үөрүү, дьэ, буолла!
ОЛ БАРЫТА БААЙЫҺАПТАР!
БААЙЫҺАПТАР —
АММАЛАР!!!
Амма,балаҕан ыйын 10 күнэ, 2023 сыл