Улуус баһылыга Степан Кузьмин кыстык уонна хомуур үлэтин билсэ нэһилиэктэринэн сырыыта салҕанар. Тыа хаһаайыстыбатын управлениетын салайааччыта Ион Кононовы кытта Эмис, Алтан уонна Сатаҕай нэһилиэктэригэр сылдьан тыа хаһаайыстыбатын эрэ боппуруостарынан буолбакка, нэһилиэк кыстыгы хайдах көрсөн эрэрин билистилэр.
Биһиги нэһилиэкпитигэр улуус салайааччылара тыа хаһаайыстыбатын эйгэтэ кыстыкка бэлэмин, оттооһун түмүгүн билистилэр. Бааһынай хаһаайыстыбаларга сырыттылар. Саҥа саҕалаан эрэр урбаанньыт Дмитрий Пестерев туттан эрэр хотонун көрдө, кэпсэттэ, былааннарын билистэ. Салгыы биир улахан «Сата» бааһынай хаһаайыстыбабыт бэрэссэдээтэлэ Михаил Бубякины көрүстүлэр, көрсөр уустуктарын ыйыттылар. Эһиилги үүтү тутуу кээмэйэ сүөһү ахсаанынан буолбакка, төһө үүтү туттара сылдьаргынан буолуон сөп диэн эттилэр. Ол түгэнигэр Эмискэ үүт собуота үлэлиэхтээх. Быйыл улуус үрдүнэн эмистэр үчүгэйдик оттообуппутун бэлиэтээтилэр, — диэн Эмис нэһилиэгин баһылыга Прокопий Бубякин иһитиннэрэр.
Эмис кэнниттэн Степан Кузьмин уонна Ион Кононов салгыы Алтан уонна Сатаҕай нэһилиэктэригэр сырыттылар. Алтаҥҥа тыа сирин кэлимник сайыннарыы бырагырааматынан тутулла турар кулууп дьиэтин көрдүлэр. Тутааччылар графикка киирэн эрэллэрин, быйыл сыл бүтүүтэ эбийиэк үлэҕэ киириэхтээҕин бэлиэтээтилэр.
Алтаҥҥа улахан тэрээһиннээх хаһаайыстыба суох. Ол гынан баран ситиһиилээхтик үлэлиир бааһынай хаһаайыстыбалар бааллар. Биир оннук улахан хаһаайыстыбалаах Константин Сутаков буолар. Киниэхэ сылдьан үлэтин билистибит. Хаһаайыстыба отун оттоон, үүтүн туттара сылдьар. Манна саамай улахан кыһалҕа кини хотоно буолар. Бу чахчы хаарбах туруктаах хотон. Онон кини саҥа эбийиэги туруорсарын өйдүүбүт уонна бу боппуруоһу быһаарыыга үлэлэһиэхпит.
Сатаҕайга Лукин аатынан тэрээһиннээх хаһаайыстыба баар. Манна кинилэр сүөһү аһылыгар ыһар бурдуктарын бааһынатыгар сырыттыбыт. Үүнүү орто диэххэ сөп. Маны сэргэ Василий Никитин салайааччылаах “Чараҥнаах” уонна Семен Анисимов салайааччылаах “Сэппэрээк” бааһынай хаһаайыстыбаларын үлэлэрин билистибит. Бу күннэргэ сайылыктан кыстык хотонноругар көһөөрү бэлэмнэнэллэр.
Эмискэ сааһыран уонна араас биричиинэнэн сүөһүлэрин кыайан көрбөт дьонтон сүөһүлэрин ылан көрөн, кыстатар баҕа санаалаах Дмитрий Пестеревы бэлиэтиибит. Маннык саҕалааһыннар нэһилиэк дьаһалтатын көмөтүнэн хас нэһилиэк аайы баар буолуохтарын наада. Оччотугар эрэ биһиги баар сүөһүбүт ахсаанын тутан, бородууксуйаны элбэтэн, харчы аахсар да, сибиэһэй эт-үүт да өттүнэн хааччынар кыахтаахпыт, — диэн Амма улууһунааҕы тыа хаһаайыстыбатын управлениетын салайааччыта Ион Кононов сырыы түмүгүн билиһиннэрдэ.
“Амма олоҕо” хаһыат.