Баһылык Покровка бааһыналарыгар ыһыы хаамыытын билистэ

Амма улууһугар ыһыы үгэннээн  барар. Бурдук үүннэрээччилэр кыра да сииги куоттарбат туһугар түүннэри-күннэри бааһынаттан тахсыбаттар, ыһыыны бириэмэтигэр бүтэрэр соруктаах түбүгүрэллэр. Улуус баһылыга Степан Кузьмин тыа хаһаайыстыбатын управлениетын салайааччыта Ион Кононовы кытта саамай элбэх ыһыы сирдээх «Амма» АУо-гар тиийэн бааһынаҕа ыһыы хаамыытын билистэ,  үлэһиттэри кытта көрүстэ. 


«Уопуттаах бупрдук үүннэрээччилэр хаһан да буоларын курдук күргүөмнээхтик ыһыыга бастакынан киирэн үлэни ыыта сылдьаллар. Бааһыналарга былырыын паардааһын үлэтэ баран үчүгэй. Онон түспүт туораах бурдук аны күһүн бурдук буолан анньан тахсарыгар эрэнэбит.  Хаһаайыстыба хаһыс да сылын кэлии сиэмэни буолбакка, бэйэтэ үүннэрбит бурдугун ыраастаан, сиэмэҕэ  бэлэмнээн ыһар.  Былырыын оройуоннаммыт сиэмэ үчүгэй үүнүүнү биэрбитэ. Биһиги тахса сылдьарбытыгар 10 техника, 20-чэ киһи ыһыыга үлэлии сылдьалларын хаһаайыстыба салайааччыта Роман Сергеевич Спасьев, биригэдьиир Александр Владимирович Могильников билиһиннэрдилэр.

Былырыын саҥа кэлбит түөрт эпэрээссийэни тэҥинэн оҥорор техника бары күүһүн туһанан үлэлэтэ сылдьалларын көрөн астынныбыт. Хаһаайыстыба уопсайа 1610 гектарыттан күнү бүгүн 600-тан тахса  гектарын ыспыттар . Үс бааһынан ыһыы бара турар.  Бэс ыйын 1 күнүгэр,  ол эбэтэр кэлэр нэдиэлэ бүтүүтэ ыһыы үлэтин бүтэрэр былааннаахтар», — диэн улуус баһылыга Степан Кузьмин Покровкаҕа сырыытын билиһиннэрдэ.

«Амма олоҕо» хаһыат

Читайте дальше