Улуус баһылыга Степан Кузьмин Дьокуускай куоракка суол оҥоһуутун боппуруостарынан кэпсэтиилэри ыытта. Суол – олох хорук тымыра, сайдыы сүрүн тирэҕэ буоларынан, бу боппуруоска улахан болҕомто ууруллар. Баһылык РИАК “Автодор” дириэктэрэ Ариан Сидоровтыын көрүстэ.
“Билэргит курдук улууспутугар атырдьах ыйын 26 күнүгэр умнуллубат историческай түгэн буолбута. Ол курдук “Амма” айан суолугар бастакы асфальт ууруллуутун үөрүүлээх тэрээһинэ ыытыллан, манна Ил Дархан Айсен Сергеевич Николаев кыттыыны ылбыта. Кини өссө ааспыт сылга кэлэ сылдьан, Аллараа Бэстээх-Амма суола 2028 сылга диэри асфалланарын туһунан иһитиннэрэн, өрөспүүбүлүкэ суолун хаһаайыстыбатын министиэристибэтигэр асфаллааһыны 2028 сылга бүтэрэргэ сорук туруорбута. Билигин бу үлэни РИК “Автодор” тэрилтэ ыыта сылдьар. Онон биһиги бу тэрилтэни кытта ыкса сибээһи тутуһан үлэлиэхпит. Дириэктэр Ариан Калинович Сидоровы кытта көрсөн аны кэлэр сылларга асфаллааһын боппуруостарын кэпсэттибит. Биллэрин курдук асфальт ууруллуута учаастактарынан баран иһиэ. Маны сэргэ билигин улууспутугар асфальт собуота турбутунан, улуус киинин иһигэр уонна нэһилиэктэрбит иһинээҕи суоллары оҥорууга эмиэ собуот кыаҕын туһанар туһунан суол хаһаайыстыбатын министиэристибэтин бэрэстэбиитэллэрин кытта кэпсэттибит”, — диэн Степан Николаевич суол оҥорооччулары кытта көрсүһүүтүн туһунан сырдатта.
“Амма олоҕо” хаһыат