Амма улууһун баһылыга Степан Кузьмин күн бэҕэһээ Төрөөбүт төрүт тыл уонна сурук — бичик күнүн көрсө диэн тылы харыстааһыҥҥа, хаалларыыга туһуламмыт сонун дьаһалын таһаарда. Дьаһалга туох киирдэ?
Улуус баһылыга Степан Кузьмин СӨ Тыл туһунан Сокуонугар олоҕуран саха тыла судаарыстыбаннай харыстабыллаах, кинини киэҥник туттуу инниттэн төрөөбүт төрүт тыл уонна сурук бичик күнүн декадатын чэрчитинэн 288№-дээх дьаһала олунньу 12 күнүгэр таҕыста.
Бу дьаһал быһыытынан улуус территориятыгар баар ханнык бас билиигэ баалларыттан тутулуга суох бары тэрилтэлэр үлэлиир компьютердарыгар сахалыы шриби туруоруохтаахтар. Дьаһал олоххо киириитин хонтуруола баһылыгы социальнай боппуруостарга солбуйааччы Нюргуяна Илларионоваҕа сүктэриллиннэ.
“Дьаһалы бары толорон, олохпутугар чиҥник киирдэҕинэ, улуус тэрилтэлэрэ хайа баҕарар сахалыы тугу да көннөрбөккө, сахалыыга көһөрбөккө хайа баҕарар докумуоннарынан атастаһыахтарын сөп. Онон мин саныахпар бу ийэ тылбытын туттууга олус сөптөөх быһаарыныы дии саныыбын уонна олоххо киирэригэр бары тэрилтэлэр күүскэ үлэлиэхтэригэр баҕарабын”,- этэр диэн Нюргуяна Ивановна.
“Амма олоҕо” хаһыат