СӨ бочуоттаах мецената, СӨ норуотун хаһаайыстыбатын үтүөлээх үлэһитэ, Амма уонна Мэҥэ Хаҥалас улуустар бочуоттаах олохтооҕо Руслан Федотов байыаннай чаастан Грамотанан бэлиэтэннэ.
Амма улууһугар СӨ ситэриилээх былааһа 2024 сылга ыытыллыбыт үлэни-хамнаһы үс күн устата бары нэһилиэктэринэн отчуоттаата. Түмүктүүр тэрээһин Амма нэһилиэгэр буолла. Отчуот саҕаланыан иннинэ наҕараадалары туттарыы буолла. Отчуоттуур бөлөҕү салайан илдьэ сылдьар СӨ экологияҕа, айылҕаны туһаныыга уонна ойуур хаһаайыстыбатыгар миниистирэ Евгений Перфильев анал байыаннай дьайыы саҕаланыаҕыттан бэйэтин ахсаабат көмөтүн, өйөбүлүн оҥоро сылдьар биллэр урбаанньыт Руслан Федотовка Илиҥҥи байыаннай уокурук, 218 танковой полк, 127 мотострелковай дивизия, 5-с гвардейскай общевойсковой аармыйа кэлэктиибин аатыттан 218 танковой полк командирын, подполковник Николай Дола илии баттааһыннаах Грамотатын туттарда.
«Биһиги мантан оҥорор көмөбүт онно сылдьар уолаттарбытыгар олус наада уонна кинилэргэ күүтүүлээх. Оҥоһуллар көмө, өйөбүл уолаттар санаалара бөҕөргүүрүгэр, кыайыыга эрэллэригэр төһүү күүс буолар. Кинилэр махтанан эрийэллэр, санааларын этэллэр. Ол курдук биһиги улууспут дьоно-сэргэтэ, Римма Васильевна Алексеева салайааччылаах «Амарах сүрэх» уопсастыбаннай хамсааһын, Анфиса Алексеевна Федорова салайар өрөспүүбүлүкэтээҕи «Илии сылааһа» түмсүү Амматааҕы филиала, анал байыаннай дьайыы буола турар сиригэр үлэлээбит биир дойдулаахтарбыт, тирэх пуун салайааччыта Петр Иннокентьевич Лебедев, бу пуун суоппара Василий Владимирович Швердин эмиэ ахсаабат көмөнү оҥороллоруттан, Амма буоларбыттан киэн туттабын уонна махтанабын. Биһиги тэрилтэбит 218 танковай полкаҕа бөҕө-таҕа, бронялаах фермер УАЗ массыынаны биэрбиппит. Бу полкаҕа биһиги «Чех» диэн позывнойдаах биир дойдулаахпыт, Алтантан төрүттээх сулууспалыы сылдьар уонна бу массыынаны сүүрдэр. Кыайыы биһиэнэ буолуо диэн эрэнэбин уонна бэйэм көмөбүн оҥорон ол кыайыыны чугаһатарбыттан сэмээр үөрэбин», — диэн Руслан Еремеевич санаатын үллэһиннэ.
«Амма олоҕо» хаһыат