Амма Наахара нэһилиэгэр учуутал идэтин баһылаабыт икки педагогическай династия үлэлиир. Бүгүн учуутал күнүнэн СӨ үтүөлээх учууталын, «Учууталлар учууталлара» бэлиэ хаһаайкатын, Слепцовтар, Устиновтар учууталлар династияларын биир бастыҥ көрдөрүүлээх учууталын, үөрэх сылын түмүгүнэн Амма Наахара оскуолатын үөрэнээччилэригэр «Бaстыҥ выпускник» истипиэндийэни анааччыны, Амма Наахара нэһилиэгин Бочуоттаах олохтооҕун, физика уонна информатика учууталын, үлэ бэтэрээнэ Лия Елисеевна Устинова туһунан кэпсиэхпин баҕарабын.
Лия Елисеевна үөрэтэр физика, информатика курдук ыарахан ол эрээри, күннээҕи олоххо олус наадалаах уруоктара үөрэх ирдэбилигэр толору эппиэттииллэр. Бастыҥ учуутал алын сүһүөхтэртэн саҕалаан эбии роботехника куруһуогун ыытар. Манна оҕолор сөбүлээн дьарыктаналлар, ситими да нөҥүө киирэн холкутук үлэлииллэр.
Быйылгы үөрэх дьылыттан «Точка роста» кииҥҥэ үөрэнээччилэри физика билимигэр салайар. Хас да кинигэ тахсарыгар үлэлэспит киһибит хаһаайка мааныта, ырыаһыт бэрдэ, холку көҕүстээх, киэҥ билиилээх, сүбэһит үтүөтэ, бастыҥ дьүөгэ буолар. Лия Елисеевна үөрэнээччилэрэ билигин сорохторо үөрэнэ, сорохторо кини туйаҕын хатаран иитээччи, учуутал үрдүк аатын сүгэн үлэлииллэр-хамныыллар. Үөрэппит-такайбыт 48-с үөрэнээччитэ таптыыр учууталларын туйаҕын хатаран Саха сирин араас муннуктарыгар күннэтэ билиилэрин үгүс үөрэнээччилэригэр бэрсэллэр, үөрэх-билии суолунан оҕолору эрэллээхтик хаамтараллар. Быйылгы үөрэх сыла Лия Елисеевна үрдүк наҕараадалаах көрүстэ. Ол курдук биһиги учуутапбыт күһүҥҥү учууталлар мунньахтарыгар «Учууталлар учууталлара» үрдүк ааты сүктэ!
Лия Елисеевна иллэҥ кэмигэр хаһыс да сылын курууссалары уонна индюктары иитэр. Көтөрдөрүн сибиэһэй сымыытынан чугас дьонун, доҕотторун күндүлүүр. Аны айылҕа уруоктарыгар, кылаас чаастарыгар оскуола үөрэнээччилэригэр үөрэтэр хайысхалаах билсиһии уруоктарын ыытарын оҕолор олуһун астыналлар, тиэргэнигэр баран сөҕө көрөллөр.
Таптыыр учууталларын дьарыгын үөрэнээччилэр киэҥ туттан туран дьиэлэригэр кэпсээн гына кэпсииллэр, бэйэлэригэр билии эбинэн үөрэллэр. Киэҥ туттар учууталларыгар Лия Елисеевна Устиноваҕа үөрэнээччилэр доруобуйаны, ситиһиини баҕаран эҕэрдэлэрин тиэрдэллэр.
Ирина КОРЯКИНА-ОЛЕСОВА