Ааспыт нэдиэлэҕэ тыа хаһаайыстыбатын управлениетын салайааччыта Ион Кононов от былаанын 60 бырыһыаҥҥа тириэрдэргэ сорук туруорбута. Кураан күннэр тураннар отчуттар хоннохтоохтук оттоон бу сорук туолла.
Тыа хаһаайыстыбатын управлениетын биэрэр субуоккатынан атырдьах ыйын 14 күнүн туругунан улуус үрдүнэн оттооһун былаана 68 бырыһыаҥҥа тэҥнэстэ, 21907,5 тонна от оттонно. Ити иһигэр тэрээһиннээх хаһаайыстыбалар отчуттара 4945 тонна, бааһынай хаһаайыстыбалар 8768,5 тонна, онтон чааһынайдар 8194 тонна оту кэбистилэр. Нэһилиэктэринэн ылан көрдөххө, соморсуннар сезоннааҕы былааннарын 77, эмистэр, 76, 7 бырыһыаҥҥа тириэрдэн бастыҥ көрдөрүүлээхтэр.
“Ардахтар кэннилэриттэн кураан күннэр турбуттарыгар отчуттарга охсуулаахтык оттоон былааны 60 бырыһыаҥҥа тириэрдэргэ сорук туруорбутум. Маны бары ылынан, отчуттар бары нэһилиэктэринэн күүскэ оттоон былааммытын 68 бырыһыаҥҥа тириэртибит. Санатан эттэххэ быйылгы окко былаан 32239 тонна. Ол гынан баран биһиги сүөһүбүт ахсаанынан 30000 тоннанан сыл тахсабыт. Манна эбии аһылык былаана эмиэ туолуохтаах. Ол да буоллар син биир тириэрдиллибит соругу толорорго дьулуһабыт. Ордор 1200-2000 тоннаны от тиийбэт улуустарыгар атыылыырга былааннанабыт. Быйыл оттооһун үчүгэйдик баран иһэр. Ааспыт сыл бу кэмигэр 20000 тонна оттоох эбит буоллахпытына, быйыл 2000 тонна курдугунан элбэҕи оттоон иһэбит. Билигин чааһынайдар үксүлэрэ оттоон бүтэн эрэллэр. Арыый мөлтөх туруктаах билигин биһиэхэ Лукин аатынан, “Болугур” хаһаайыстыбалара буолаллар. Онтон бастыҥнарга Строд аатынан уонна “Кэскил” хаһаайыстыбалары ааттыам этэ. Бу күннэргэ сорох хаһаайыстыбалар сиилэс, сенаж бэлэмигэр киирдилэр”, — диэн тыа хаһаайыстыбатын управлениетын салайааччыта Ион Кононов от хаамыытын билиһиннэрдэ.
Управление салайааччыта бэлиэтээбитинэн, бүгүҥҥэттэн, ол эбэтэр атырдьах ыйын 15 күнүттэн улуус баһылыгын анал дьаһалынан улууска үгэс буолбут “көҥүл хотуур” биллэрилиннэ. Ол эбэтэр бу күнтэн саҕалаан оттоммокко хаалбыт ходуһаларга отторо тиийбэт дьон киирэн оттуохтарын сөп.
Ааптар: “Амма олоҕо” хаһыат
