Быйылгы үөрэх дьылын көрсө уонна Бөтүҥ орто оскуолата туттуллан киирбитэ биэс сылын көрсө үөрүүлээх линейка ньиргийдэ. Бэлиэ күҥҥэ элбэх аралдьытар тэрээһиннэр ыытыллан оҕо аймах үөрдэ-көттө, саҥа үөрэх дьылын умнуллубаттык көрүстэ.
Бөтүҥ орто оскуолатыгар Билии күнүн үөрүүлээх линейката Саха сиригэр биллэриллибит Оҕо саас сылыгар ананан ыытылынна. Өрөгөй ырыатын доҕуһуолунан дойдубут былааҕын ааспыт сылга үгүс ситиһиини аҕалбыт история уонна уопсастыба уруогун учуутала Егор Никифоров, педагогическай үлэ бэтэрээнэ Иосиф Иосифович Новиков уонна үөрэххэ, араас таһымнаах научно-практическай кэмпириэнсийэ хас да төгүллээх кыайыылааҕа 11 кылаас үөрэнээччитэ Селена Чирикова өрө көтөхтүлэр.
Быйыл Бөтүҥ орто оскуолатын боруогун 17 оҕо атыллаан киирдэ. Кинилэр маҥнайгы учууталларынан эдэр учуутал Татьяна Скрябина ананна. Долгутуулаах бастакы чуорааны маҥнайгы кылаас оҕолоро Нестерев Алимар, Гурьева Анилена уонна 11 кылаас туйгун үөрэнээччитэ Степанова Каролина, активист Филатов Харысхан тыаһаттылар. Үөрэнээччилэри, учууталлары, төрөппүттэри улуус дьаһалтатын ааттыттан Амма улууһун экономикаҕа уонна финансаҕа управлениетын начальнигын э.т. Илья Жирков, нэһилиэк баһылыгын солбуйааччы Алексей Стручков эҕэрдэлээтилэр. Үөрүүлээх линейкаҕа саҥа үлэлии кэлбит эдэр учууталлары билиһиннэрдилэр, сибэкки дьөрбөтүн бэлэхтээтилэр. Ол курдук география учуутала Андрей Кузнецов, омук тылын учуутала Ида Степанова, физкультура учуутала Владислав Чердонов уонна алын сүһүөх учуутала Татьяна Скрябина.
Линейка кэнниттэн «Дьоһуннаах кэпсэтии» бастакы тиэмэтинэн «Билии күнэ» 1 – 11 кылаастарга аһаҕас кылаас чаастара буоллулар. Маҥнайгы кылаас оҕолоро Ил Дархан Айсен Николаев бэлэҕин күннүгү үөрүүлээх быһыыга-майгыга туттулар.
«Движение первых» хамсааһын «Эрэл» түмсүү оҕолоро аныгы тэтимнээх үҥкүү кэмигэр минньигэс үбүлүөйдээх туорду киллэрдилэр. Күн иккис аҥаарыгар оҕолорго аралдьытыы буолла. Бөтүҥ орто оскуолата көҕүлээн спортивнай былаһааккаҕа Бөтүҥ нэһилиэгин дьаһалтата (баһылык А.Н. Никитин), «Биир ньыгыл Арассыыйа» Амматааҕы отделенията (сал. И.Е. Анисимов), улуустааҕы физическэй култуура уонна спорт управлениета (сал. Д.Д. Наумов) өйөбүллэринэн футболга күрэхтэһии буолла. Түмүккэ алын сүһүөх оҕолоругар 1 миэстэ Сергеев Айхал хамаандата, 2 миэстэ Филиппов Леня хамаандата, 3 миэстэ Егоров Проня хамаандата буоллулар. «Лучший игрок» – Филиппов Леня, «Лучший нападающий» – Сергеев Айхал, «Лучший защитник» – Попов Семен анал ааттары ыллылар. Улахан бөлөх оҕолоругар 1 миэстэҕэ Жарин Сахаян хамаандата, 2 миэстэҕэ Левин Айаал хамаандата таҕыстылар. Онтон «Лучший игрок» – Жарин Сахаян, «Лучший нападающий» – Борисов Тима, «Лучший защитник» – Иванов Айдын буоллулар.
Тэрээһин умнуллубат түгэнинэн буолла Умка үрүҥ эһэ уонна Тедди-мишкалар ыалдьыттааһыннара буолан оҕолор сүргэлэрин көтөхтүлэр. Бу күн грант харчытыгар ылыллыбыт саахарнай баата оҥорор тэрили сүрэхтээн оҕолор минньигэс сахарнай баатаны дуоһуйа амсайдылар.
Быйыл Арассыыйаҕа Дьиэ кэргэн сылынан холобурга сылдьар спортивнай дьиэ кэргэҥҥэ оскуола дириэктэрэ Акулина Иванова элбэх оҕолоох Розалия уонна Алексей Ивановтарга Эҕэрдэ суругу туттарда. Бу күн төрөппүттэр Розалия Иванова уонна Мавра Шишлянникова уонна “Эрэл” түмсүү оҕолоро маассабай оонньуулары ыыттылар. Анал бириистэри оскуола выпускнига Илья Жирков, олохтоох дьаһалта туруордулар. Тэрээһини тэрийиигэ күүс-көмө буолан спонсордаабыт дьоммутугар махтанабыт. Бу күн оскуолабыт оҕо дьоллоох күлүүтүнэн туолла.
Мария ИВАНОВА