Бөтүҥ нэһилиэгин «Талаана» диэн үһүс көлүөнэ түмсүүтүн далбардара нэһилиэк сайдыытыгар үгүс сыраларын ууран көхтөөхтүк үлэлииллэрин үгүс киһи билэр. Светлана Никитина түмсүү үлэтин сэргэхтик салайар. Көмүс күһүҥҥэ түмсүү чилиэннэрэ былаан быһыытынан икки күн устата мас олортулар.
Сайыҥҥылыы турбут сылаас күннэргэ “Талаана”-лар күһүҥҥү былааннарын толорон, балаҕан ыйын 25-26 күннэригэр мас олордуутун үлэтин салҕаатылар. Инники сылларга оскуола тиэргэнигэр, Кыайыы болуоссатыгар мас олордубут эбит буоллахтарына, быйыл Социалистическай Үлэ дьоруойа Анна Михайловна Васильева — Сэбиэт Аана аатынан уулуссаҕа эбии тыаттан мас түөрэн аҕалан олортулар. Олохтоох дьаһалта уонна баһылык Алексей Никитин түмсүү үлэтин өрүү өйүүр, араас тэрээһиҥҥэ техниканан хааччыйар. Бу сырыыга эмиэ баһылык солбуйааччыта Алексей Стручков, дьаһалта суоппара Афанасий Максимов тэҥҥэ сылдьыһан, күүс-көмө буолан далбардар сүргэлэрин өссө көтөхтүлэр. Үһүс көлүөнэ түмсүү далбардара нэһилиэктэрин дьаһалтатыгар махтанан туран, өссө да кыахтара тиийэринэн көмөлөһө туруохпут диэн эрэннэрдилэр.
Светлана НЕУСТРОЕВА, Бөтүҥ.