В.М. Новиков — Күннүк Уурастыырап аатынан Амматааҕы киин библиотекаҕа 2023 сыл түмүгүнэн бастыҥ ааҕааччылары чиэстиир тэрээһин буолла. Быйылгы чиэстээһин кыра уратылаах, ол курдук сыл устата библиотека ыыппыт тэрээһиннэригэр элбэхтик кыттыыны ылбыт ааҕааччылары, библиотеканы кытта ыкса үлэлэһэр дьон, сүбэһиттэр, сайдыыга бастың өйөөччүлэр ыңырылыннылар.
Кэлбит дьоммутугар анал ааттары иҥэрдибит: «Илгэлээх ийэ тыл кэрэһитэ» — Ноговицына Мария Дмитриевна, «Сайдыыга бастың өйөөччү» — Неустроева Саргылаана Петровна, «Сайдыыга бастың өйөөччү» — Амма нэһилиэгин дьаһалтата, баһылык Артемьев Михаил Алексеевич, «Кэрэҕэ уһуйааччы» — Захарова Туймаада Апполоновна, «Быйаңнаах оҕуруотчут» — Карманова Марина Дмитриевна, «Сүмэлээх сүбэһит» — Караканова Матрена Афанасьевна, «Эрэллээх аргыс» — культура управлениета, салайааччы Иванов Иван Федорович, «Эрэллээх аргыс» — Эверстова Туйаара Еремеевна, «Көхтөөх кыттааччы» — Васильева Екатерина Семеновна, «Ытык саастаах ааҕааччы» — Иванова Фаина Романовна, «Өбүгэ ситимин түстээччилэр» — Марфа Семеновна, Лаврентий Алексеевич Агаповтар.
Лариса Винокурова иилээн-саҕалаан ыыппыт үөрүүлээх тэрээһинигэр эҕэрдэ тылы библиотека директора Шишигин Юрий Егорович эттэ, ааҕааччыны кытта үлэлиир салаа сэбиэдиссэйэ Сидорова Елизавета Владимировна кылгастык ааспыт сыл ситиһиилэрин слайд-презентация нөңүө билиһиннэрдэ, кэлбит ааҕааччыларга махталын тириэртэ. Сынньалаңңа викторина оонньоттубут. Кэлбит ыалдьыттарга ылбаҕай ырыатын Чапчылҕаннааҕы култуура дьиэтин хореограба Сангима Романова бэлэх уунна.
Итии чэйдээх төгүрүк остуол тула истиң иһирэх кэпсэтии буолла, ааҕааччылар инникитин библиотека үлэтигэр туох саңаны киллэриэххэ сөбүн, баҕа санааларын үллэһиннилэр.
Кэлбит ыалдьыттар бары үөрэн-көтөн, илии тутуурдаах тарҕастылар.
Лариса Винокурова.