Амма нэһилиэгин дьаһалтата 2018 сылтан олохтоох көҕүлээһиннэри өйүүр бырагыраамаҕа көхтөөхтүк кыттар. Бу сыллар устата барыта 10-тан тахса бырайыак олоххо киирэн, Аммабыт тас көстүүтүн тупсардылар, дьон-сэргэ, оҕо аймах сөбүлээн мустар кэрэ, бэлиэ миэстэлэрэ буоллулар.
Бэҕэһээ Амма нэһилиэгин баһылыга Михаил Артемьев холбоһуктаах тэрилтэлэр идэлээх сойуустарын бэрэстэбиитэллэрин кытта көрсөн мунньах ыытта. Мунньахха куонкурус хамыыһыйатын чилиэттэрэ Альберт Яковлев, Василий Дьяконов, Анна Расторгуева, Николай Жирков, Александр Попов, маны тэҥэ бырайыак ааптардара “Хардыы” түөлбэ салайааччыта Мария Кузнецова, “Сэргэлээх” түөлбэ көҕүлүүр бөлөҕүн чилиэнэ Леонид Саввин кытыннылар.
Мунньах саҕаланыытыгар Михаил Алексеевич бу күһүн ыытыллыбыт онлайн-куоластааһын түмүктэрин кытта билиһиннэрдэ. Уопсайа биэс бырайыак кыттыбытыттан “Хардыы” түөлбэ “Мини-футбольное поле” бырайыага бастакы (барыта 1829 киһи, 34%), “Олоҥхо” скульптурнай композиция иккис (1177 киһи, 21,8%) уонна “Сэргэлээх” түөлбэҕэ СӨ үтүөлээх тренерэ М.С. Скрябин искибиэригэр уулусса тренажердарын туруоруу” бырайыак үһүс (1130 киһи, 21%) миэстэ буоланнар, салгыы Үп министиэристибэтин сүүмэрдиир түһүмэҕэр ааспыттара. Хамыыһыйа быһаарбытынан, бу үс бырайыак олоххо киирэригэр өрөспүүбүлүкэ бүддьүөтүттэн 6 мөлүйүөн солкуобай үп көрүллүбүт. Амма нэһилиэгин дьаһалтата хас биирдии бырайыакка 300 000 солкуобайы, ол эбэтэр 900 000 солк. нэһилиэк бүддьүөтүгэр көрөн олорорун иһитиннэрдэ.
Куонкурус биир сүрүн ирдэбилинэн, бырайыактар олоххо киирэллэригэр нэһилиэнньэ харчынан көмөтө буолар. Маныаха Амма нэһилиэгин холбоһуктаах тэрилтэлэрэ, биирдиилээн дьон, спонсордар өрүү күүс-көмө буолаллар. Бу да сырыыга идэлээх сойуустар бэрэстэбиитэллэрэ Аммабыт сайдыытыгар туһуламмыт бырайыактары өйүүллэрин биллэрдилэр. 400-тэн тахса тыһыынча солкуобай сууманы 14 холбоһуктаах тэрилтэҕэ үллэрэн, 31 000 солк. сууманы 2024 сыл кулун тутар 1 күнүгэр диэри хомуйарга быһаардылар.
Вера ИВАНОВА