Бу күннэргэ Чурапчы улууһугар биллиилээх тренер Дмитрий Петрович Коркин аатынан Өрөспүүбүкэтээҕи оҕо спортивнай оскуола-интернатыгар дуобат күрэҕэ буолан ааста. Күрэх сүрүн сыалынан саҥа үөрэх сылыгар дуобат сезонун аһыы, оҕо дуобакка оонньуур дьоҕурун сайыннарыы, саҥа дуобатчыттары аптаах хонууга киллэрии уонна оҕо оонньуур таһымын үрдэтии буолла. Күрэххэ Амматтан, Мэҥэ-Хаҥаластан, Тааттаттан, Чурапчыттан, Дьокуускай куораттан 100 тахса дуобатчыт кытынна.
Үлэ геройа П.И. Яковлев аатынан Амма Наахара орто оскуолатын Валерий Иванович Гаврильев дьарыктыыр биэс дуобатчыта Тунаара Кузьмина (2-с кылаас), Аэлита Александрова (3-с кылаас), Сайаана Макарова (6-с кылаас), Дима Ефремов (7-с кылаас), Далаана Яковлева (8-с кылаас) бу күрэххэ сырыттылар. Амма улууһун биир күүстээх дуобатчыта, элбэх күрэхтэр кыайыылаахтара, үгүс оҕону дуобат тумара хонуутугар киллэрбит, эрчийбит кыһамньылаах тренер Валерий Иванович оҕолору ханнык баҕар күрэххэ бэйэтин массыынатынан илдьэн сылдьан кытыннарар. Оҕолор күрэхтэн өрүү ситиһиилээх кэлэллэрэ төрөппүккэ, нэһилиэккэ үөрүүлээх сонун буолар. Бу күрэххэ Валерий Гаврильев дьарыктаабыт оҕолоро Ванесса Штейнберг Чурапчы, Алгыс Матвеев Мэҥэ Хаҥалас улуустарыттан кытыннылар. Маҥнайгы күн 100 харахтаах күрэххэ 2011-2013 с.т. кыргыттарга Сайаана Макарова 1-кы миэстэ, Штейнберг Ванесса 2-с миэстэ буоллулар. Бу сыллаах уолаттарга Алгыс Матвеев 2-с миэстэни ылбыта олус үөрүүлээх. 2008-2010 с.т. уолаттарга Дима Ефремов 3-с миэстэҕэ таҕыста. Иккис күн нуучча дуобатыгар ол эбэтэр 64 харахтаах оонньууга 105 дуобатчыт кытынна. Манна 2011-2013 сыллаах кыргыттарга Ванесса Штейнберг бастакы, Сайаана Макарова иккис миэстэни ылан кыайыы өрөгөйүн биллилэр. Уолаттарга Алгыс Матвеев 3 миэстэни ылары ситистэ.
2008-2010 сыллаах кыргыттарга Далаана Яковлева, уолаттарга Дима Ефремов иккиэн 3-с миэстэни ыллылар. Кыракый кыргыттарбыт Аэлита Александрова 6-с, Тунаара Кузьмина 9-с буолбуттара элбэҕи эрэннэрэр. Кыайыылаахтар мэтээлинэн, туоһу суругунан наҕараадаланнылар. Мантан сэгэнэн эттэххэ күһүөрү Алгыс Матвеев, Тунаара Кузьмина, Дима Ефремов Санк- Петербург куоракка Аан дойду таһымнаах дуобат күрэҕэр кыттыыны ылбыттара. Бу спорт көрүҥэр оҕо, төрөппүт, тренер тэҥҥэ үлэлээтэхтэринэ ситиһии сиэтиллэр, кыайыы өрөгөйдөнөр.
Ирина Корякина – Олесова.