Бүгүн, ыам ыйын 21 күнүгэр, ССРС гражданскай оборонатын туйгуна, СӨ үөрэҕириитин туйгуна, РФ уопсай үөрэхтээһинин бочуоттаах үлэһитэ, СӨ үөрэҕириитин бочуоттаах бэтэрээнэ, Бөтүҥ нэһилиэгин уонна Амма улууһун бочуоттаах олохтооҕо, отставкаҕа олорор капитан званиелаах Иосиф Новиков 80 сааһын томточчу туолла.
Иосиф Иосифович Новиков 40-тан тахса сыл устата Амма улууһун үөрэҕин эйгэтигэр үүнэр ыччаты үөрэтиигэ-иитиигэ үлэлээн кэлбитэ. Ол курдук өр сылларга Бөтүҥ орто оскуолатыгар байыаннай дьыаланы үөрэппитэ уонна 13 сыл бу оскуола дириэктэринэн үлэлээбитэ. Итини сэргэ салайар, тэрийэр дьоҕурдаах буолан 1985 сылтан 1994 сылга диэри Бөтүҥ олохтоох Сэбиэтин бэрэссэдээтэлинэн, райсовет тэрийэр отделыгар, олохтоох дьаһалтаҕа исписэлииһинэн ситиһиилээхтик үлэлээбитэ. Кини үлэлиир кэмигэр нэһилиэк социальнай-экономическэй сайдыытыгар үс сыл устата үрдүк ситиһиилэри ылбытын иһин Бөтүҥ олохтоох Сэбиэтэ үйэ-саас тухары илдьэ сылдьарга Кыһыл Знамянан наҕараадаламмыта. Бу кыайыы нэһилиэк олохтоохторун, уопсастыбаннай тэрилтэлэрин, депутаттарын дьоһун ситиһиилэрэ буолар. Иосиф Иосифович 1990, 1992, 1995, 2007 сылларга нэһилиэк дьокутаатынан талыллан үлэлээбитэ.
1980-1990 сс. байыаннай сулууспа үөрэнээччилэрин бэлэмнээһиҥҥэ үрдүк түмүктэри ситиспитэ. Ол курдук кини иитиллээччилэрэ бу сылларга хас да сыл устата улуустааҕы уонна өрөспүүбүлүкэтээҕи «Зарница» уонна «Орленок» байыаннай-спортивнай оонньууларга хас да сыл субуруччу 1-2 миэстэ буолаллара.
Аммаҕа биир бастакынан байыаннай кабинеты тэрийэн, учууталлар күүстэринэн сылаас тир туппуттара. Уҕараабаты эрчимнээх учуутал 2005 сылтан дуобат куруһуогун тэрийэн үлэлэтэр. Ол түмүгэр иитиллээччилэрэ улууска уонна өрөспүүбүлүкэҕэ кэккэ ситиһиилэммиттэрэ. Холобура Семенов Дьулустан, Непомнящай Ньургун Амма улууһун дуобакка сүүмэрдэммит хамаандатыгар киирэн зональнай оонньуулар кыайыылаахтара буолаллар, спорт маастарын аатын ыллылар. Билигин Иосиф Иосифович дуобатчыттар кулууптарын уонна байыаннай- патриотическай кулууптарын наставнига буолар.
Үлэлээбит, билигин да сибээһин быспакка сылдьар, наставниктыыр оскуолата Иосиф Иосифович үбүлүөйдээх сааһыгар сөп түбэһиннэрэн аныгы ирдэбилинэн «Основы безопасности и защиты Родины» диэн кабинет арыйда уонна улуустааҕы «Зарница» байыаннай-патриотическай оонньууну ыыттылар. Иосиф Иосифович төһө да ытык сааһыгар үктэннэр, билигин да эдэрдии эрчимнээх, байыаннайдыы хамсаныылаах. Тапталлаах кэргэнинээн Мария Прокопьевналыын былырыын бииргэ олорбуттара 50 сылларын бэлиэтээбиттэрэ. Үс оҕолоох, аҕыс сиэннээх дьоллоох ийэ, аҕа, эбээ, эһээ буолаллар. Убаастабыллаах Иосиф Иосифовыһы өрөгөйдөөх ытык сааһынан истиҥник эҕэрдэлиибит уонна бу курдук эрчимҥин сүтэрбэккэ, эдэрдэргэ сүбэ-ама буолар сырыт диэн алгыыбыт.
Бастыҥ учуутал, наставник туһунан, киниттэн оскуола дириэктэрин эстафетатын туппут Акулина Иванова сиһилии суруйуутун хаһыат ыам ыйын 31 нүөмэригэр ааҕаарын.
“Амма олоҕо” хаһыат