Саастаах киһиэхэ мас-муус үлэтэ ылбычча кыайтарбатын билэбит буоллаҕа. Маннык түгэҥҥэ кырдьаҕастарга эдэр тимуровецтар көмөҕө кэлэллэр. Бу өрөбүлгэ Амма 1 нүөмэрдээх орто оскуолатын үөрэнээччилэрэ киин балыыһа бэтэрээн үлэһитигэр маһын хайытан, сааһылаан биэрдилэр.
В.Г. Короленко аатынан 1№-дээх оскуола 8 “а” кылааһын уолаттара кылаас салайааччыта Владислав Константиновтыын 71 саастаах Чапчылҕан олохтооҕо Марта Скрябинаҕа улахан көмө буоллулар. Саастаах дьон декадаларын чэрчитинэн кыстыыр оттук маһын хайытан, саһааннаан улахан үлэни үмүрүттүлэр.
-Кэлэн иһэр сомоҕолоһуу күнүнэн үөрэнээччилэри, учууталларын, оскуола салалтатын эҕэрдэлээн туран үлэлэригэр, үөрэхтэригэр ситиһиилэри, туйгун доруобуйаны, тус олохторугар дьолу баҕарабыт. Инникитин даҕаны тимуровскай хамсааһын сүтэн симэлийэн хаалбакка, үтүө дьыала үксүү турдун,- диэн Чапчылҕан олохтооҕо Марта Егоровна Скрябина махталын тиэрдэр.
“Амма олоҕо” хаһыат.