Амма улууһун дьаһалтатын аактабай саалатыгар “Үлэ аргыстаах эдэр саас” бырайыак кыттыылаахтара, “Арассыыйа ийэлэрэ”уопсастыбаннай хамсааһын Амма улууһугар салаатын (сал. О.И. Архипова) чилиэннэрэ биллэр блогер, Майатааҕы кыраайы үөрэтэр түмэл дириэктэрэ Масаха Михаилы – Масаха Мэхээһи кытта көрүстүлэр. Көрсүһүүнү улуустааҕы кииннэммит бибилэтиэкэ дириэктэрэ Прокопий Прокопьев салайан ыытта.
«Арассыыйа ийэлэрэ» уопсастыбаннай хамсааһын Амма улууһугар салаата “Үлэ аргыстаах эдэр саас” бырайыак чэрчитинэн диэн 40-50-60-70 сылларга үлэлээн ааспыт дьоммутун үйэтитиигэ дьиҥ чахчылары уһулан, оҥорон, олохторо умнуллубакка архыыпка тиһиллэн киэҥ эйгэҕэ тарҕанар сыаллаах-соруктаах биэс сыл үлэлээн кэллибит. Ол курдук десант тэринэн 8 улууһу хабан үлэлэһэ сылдьабыт. Ол чэрчитинэн Майатааҕы кыраайы үөрэтэр түмэл дириэктэрэ, блогер Масаха Михаил Иванович — Масаха Мэхээс кыттыылаах көрсүһүү тэриллэн, ирэ-хоро кэпсэттибит. Күннүк Уурастыырап аатынан кииннэммит бибилэтиэкэ дириэктэрэ Прокопий Прокопьев бу бырайыак сүрүн соругун, үлэ хаамыытын билиһиннэрдэ. Салгыы бырайыак ааптара Наталья Борисова бу үлэбит хайысхатын, киэн эйгэҕэ тарҕанарын, бырайыак куратора Галина Бочугурова урукку үлэлээн ааспыт дьоммут олохторо умнуллубатын туһугар ыытыллар үлэ сүрүн туһайыыларын кэпсээтэ. Салгыы бэйэлэрин санааларын Амма улууһун бааһынай хаһаайыстыбаларын ассоциациятын бэрэссэдээтэлэ Александра Цыпандина, Амма нэһилиэгин бэтэрээннэрин Сэбиэтин бэрэссэдээтэлин солбуйааччы Николай Кириллин, бырайыак кыттыылааҕа Марфа Харитонова эттилэр. Масаха Мэхээс аммалар бырайыактарын сэргээн, инникитин бииргэ үлэлэһэргэ, сөптөөх хайысханы булан эдэр ыччакка хаалар үлэни туорумнуурга бэйэтин баҕа санаатын, толкуйун тириэртэ. Түмүккэ бу үлэбит бигэ тирэхтээх, кэлиҥҥи кэмҥэ улахан туһалаах буолуоҕун, Масаха Мэхээс салгыы ылыммыт соругун сайыннаран , ыччат дьон кэскиллээх дьарыктаах буолуутугар Наталья Борисова, Вера Исакова баҕа санааларын тиэртилэр.
Вера ИСАКОВА