Бүгүн, тохсунньу 11 күнүгэр, Амматааҕы “Фаворит” бильярд спордун сэҥээрээччилэрин түмэр кулууп 2023-2024 сыл түмүктэрин таһаарар турнира саҕаланна. Турнир арыллар бэлиэ түгэнигэр аҕыс ый устата ситиһиилээхтик оонньообут бастыҥ бильярдистары быһааран номинациялары туттардылар. Үөрүүлээх тэрээһиҥҥэ кыттыыны улуус дьокутааттарын Сэбиэтин бэрэссэдээтэлэ Владимир Колосов сылдьан эҕэрдэлээтэ.
Санатан эттэххэ, 2024 сыл түмүгүнэн Григорий Аммосов салайааччылаах Амма улууһун “Фаворит” бильярд кулууба өрөспүүбүлүкэҕэ үрдүк тэрээһиннээх тахсан “Муниципальнай тэриллиилэргэ Бастыҥ бильярд кулууба -2024” буолан анал кубогынан, наҕараадаламмыта. Наҕарааданы СӨ спорка миниистирэ Леонид Спиридонов туттарбыта. Дьэ онтон бүгүн, субуота күн бильярд сэҥээрээччилэрэ нэһилиэктэртэн кэлэн түмүктүүр турнирга кыттыахтара. Ол иннинэ кулууп анал номинацияларын туттарда. Ол курдук кулууп алтынньыттан саҕалаан ыам ыйыгар диэри, уопсайа 8 ый устата үлэлиир. Дьэ бу кэм устатыгар бастыҥ оонньуулары көрдөрбүт, ситиһиилээх бильярдистар анал номинациялары ыллылар. Номинациялар саастарынан араарыллан ананнылар. Ол курдук 50 саастарыгар диэри оонньооччуларга “Бастыҥ оонньооччу” аатын Амматтан Алексей Пахомов, “Көхтөөх оонньооччу” аатын Алтантан Мичил Пахомов, 50-тан 60 саастаахтар ортолоругар “Бастыҥ оонньооччу” аатын Амматтан Игнат Гаврильев, “Көхтөөх оонньооччу” аатын Петр Шестаков, 60-тан үөһээ саастаахтарга “Бастыҥ оонньооччу” – Сатаҕайтан Афанасий Неустроев, “Көхтөөх оонньооччу” – Болугуртан Василий Ефремов, кэрэ аҥардар ортолоругар “Бастыҥ оонньооччу” ааты Эмистэн Галина Куприянова, “Көхтөөх оонньооччу” – Амматтан Аграфена Лобанова ыллылар. Онтон “Бастыҥ бильярд кэлэктиибэ” ааты Амма улууһун нэһилиэктэриттэн Болугур нэһилиэгэ ылан кыайыы өрөгөйүн биллэ. Григорий Аммосов бэлиэтээбитинэн Болугурдар бу оонньуур сезон устата элбэхтик киирэн күрэхтэһиилэргэ кыттыбыттар, бириистээх миэстэлэри ылбыттар.
“Биһиги “Фаворит” кулууппут 8 ый устата уопсайа 12 күрэхтэһиини ыыттыбыт. Ону кытта Дьокуускай куоракка, Мэҥэ Хаҥалас, Чурапчы улуустарыгар ыытыллыбыт бильярд күрэхтэһиилэригэр баран көхтөөхтүк кыттыбыппыт. 2024 сылга бэтэрээннэрбитигэр саамай элбэх түмүктэри Сатаҕайтан Афанасий Романович Неустроев ситистэ. Ол курдук кини өрөспүүбүлүкэ чемпионатыгар кыттан аҕыс бастыҥнар ахсааннарыгар киирбитэ. Онно кинини Саха өрөспүүбүлүкэтин спорка министиэристибэтэ уонна бильярдын федерацията Бочуотунай грамотанан бэлиэтээбитэ. Ити курдук биһиги кэккэбитигэр үөлээннээхпит Владимир Терентьев доруобуйатынан хааччахтаах дьон ортотугар Хабаровскай куоракка баран үһүс төгүлүн үһүс миэстэ буолан кэллэ. Онон дьоммут бэрт ситиһиилээх бу ааспыт сылы түмүктээтилэр. Бүгүн бэйэбит испитигэр 2023-2024 оонньуур сылбытын түмүктүүр турнир ыытабыт. Манна икки бөлөҕүнэн арахсан оонньуу буолуо”, — диэн Григорий Григорьевич билиһиннэрэр.
Турнир үөрүүлээх арыллыытыгар улуус дьокутааттарын Сэбиэтин бэрэссэдээтэлэ Владимир Колосов кэлэн кыттыыны ылан бэйэтин эҕэрдэтин тириэртэ уонна бэтэрээн оонньооччу Сатаҕайтан Афанасий Неустроевка улуус дьаһалтатын үрүҥ көмүс бэлиэлээх Бочуотунай грамотатын туттарда.
Турнир түмүктэрин биһиги сайтпытыгар билсээрин.
“Амма олоҕо” хаһыат