Арассыыйаҕа дьиэ кэргэн, өрөспүүбүлүкэҕэ оҕо саас, Болугур нэһилиэгэр аҕа сылынан нэһилиэккэ 50 сыл уонна 25 сыл бииргэ олорон кэлбит ытык – мааны ыаллары, дьиэ кэргэннэри чиэстиир дьоро күн ыытылынна.
Бу үөрүүлээх тэрээһин 2006 сылтан нэһилиэк ол кэминээҕи дьахталлар сэбиэттэрин, чуолаан салайааччы Потапова Авдотия Васильевна уонна Ефремова Оксана Константиновна көҕүлээһиннэринэн, үйэ чиэппэрэ, үйэ аҥара бииргэ олорор ыалларбытын чиэстээн күн бүгүнүгэр диэри олус сэргэхтик, өрө көтөҕүүлээхтик ыытыллар. Бу сыллар усталарыгар элбэх ыал чиэстэнэн кэллэ, дьаҥ-дьаһах кэмигэр да тохтоппокко куйаар ситиминэн эҕэрдэлээн чиэстээбиппит. Олохтоох дьаһалта, М.А. Ноговицын аатынан култуура киинэ, «Күбэйэ» дьахталлар сэбиэттэрэ, тэрилтэ профсоюзтара, түөлбэ салайааччылара, аймах – билэ дьон бары көмөлөөн, үбүлүөйдээх ыалларбытын бэлиэтиибит.
Ол курдук, быйыл Кыһыл көмүс сыбаайбалаах, 50 сыл бииргэ олорон кэлбит ытык ыалларбыт Раиса Ивановна, Василий Константинович Мартыновтар дьиэ кэргэн буолаллар. Олунньу ыйга аймахтара, атас-билэ дьоно буолан Кыһыл көмүс сыбаайба оҥорон бэлиэтээбиттэрэ. Дьиэ кэргэн сылынан от ыйын 9 күнүгэр Амма улууһугар Амма сэлиэнньэтигэр ыҥырыллан, улуус үрдүнэн 50 сыл бииргэ олорбут ыаллары чиэстиир дьоро күҥҥэ киирэн чиэстэммиттэрэ.
Үрүҥ көмүс сыбаайбалаах нэһилиэкпит үрдүнэн 7 ыалы чиэстээтибит: Анастасия Васильевна, Ньургун Афанасьевич Петровтар, Наталья Гаврильевна, Петр Прокопьевич Петровтар, Туяра Георгиевна, Константин Асклифедотович Ивановтар, Мария Владимировна, Михаил Михайлович Кожуровтар, Наталья Николаевна, Михаил Петрович Ксенофонтовтар, Саина Афанасьевна, Петр Васильевич Павловтар, Анна Васильевна, Афанасий Афанасьевич Ивановтар дьиэ кэргэн.
Дьоро күҥҥэ нэһилиэк баһылыга Петров Андрей Никитич истиҥ эҕэрдэтин тиэрдэн анал бэлиэлэри туттартаата, ону тэҥэ Гражданнар туруктарын аактатын суруйар исписсэлиис Кузьмина Мария Васильевна анал сурунаалга илии баттатта. Үөрүүлээх түгэни минньигэс туордунан, «Алгыс» үҥкүү ансамбылын алын сүһүөх оҕолоро үҥкүүлэринэн, улууска ситиһиилээх паараларбыт «Вальс» үҥкүүнэн, Саргылана Попова кэрэ ырыатынан түмүктэннэ. Үбүлүөйдээх ыалларбытын атас – доҕор, аймах – билэ дьоно, үлэлиир тэрилтэлэрэ, олорор түөлбэлэрэ, нэһилиэк кырдьаҕастарын сэбиэтэ эҕэрдэлээтилэр.
Күндү дьоммут, мэлдьи да бу курдук күлэ-үөрэ, ылыммыт тэтимҥитин кыл түгэнигэр даҕаны ыһыктыбакка, мөлтөтөн-ахсатан көрүмэҥ диэн баҕа санаабыт бастыҥын аныыбыт. Күндү көмүс оҕолоргутун, сиэннэргитин харах далыгар илдьэ сылдьан, үлэ үөрүйэхтэригэр үөрэтиҥ, олох эндирин, үөрүүтүн, өрөгөйүн үөһэ тутан, өрүү үөрэ-көтө сылдьыҥ. Дьиэ кэргэн – төрөөбүт биһикпит, тапталга бигэммит уйабыт. Дьиэ кэргэҥҥит бигэ туруктаннын, дьоһун кириэппэстии бөҕөргөөтүн.
Евдокия Платонова.