Сандал саас бастакы кэрэ бырааһынньыгын күн Болугур нэһилиэгин баһылыга Андрей Никитич Петров, Кузьмин Евгений Семенович салайааччылаах аҕа түмсүүтэ көҕүлээһинэриннэринэн «Кэрэ бэлэх» нэһилиэк эр дьонун эҕэрдэ тыллаах, истиҥ ырыалаах кэнсиэриттэн, эгэлгэ лотереятыттан кэрэ аҥардар сүргэлэрэ көтөҕүллэн, астынан, дуоһуйан бардылар.
Кулун тутар 8 күнэ Болугурдарга истиҥ иэйиилээх күн буолар. Эрдэттэн былааннанан, элбэх эр дьон кыттыылаах кэрэ киэһэни бэлэхтээбит күүстээх аҥардарбытыгар махтал тыллар этилиннилэр. Тэрээһини Владимир Тимофеев, Леонид Борисов иилээн-саҕалаан ыыттылар, баһылык Андрей Никитич Петров истиҥ тыллары этэн, кэрэ ырыатын бэлэхтээтэ. Эр дьон тоҕуоруһан тыыннаах сибэккини кэлбит кэрэ аҥардарга бэлэхтээн, бииртэн-биир кэрэ ырыалары ыллаан, эдэр ийэлэргэ көрдөөх оонньууну оонньотон, дьэ сүүйүүлээх, өр кэтэһиилээх лотереяны үөрэ-көтө саҕалаатылар.
Кэнсиэргэ эдэр аҕалар, уолаттар, орто саастаахтан, аҕам саастааҕар тиийэ көлүөнэ ситимэ эр дьон хамсааһына барыта кытынна, ырыалары М.А. Ноговицын аатынан култуура киинин хормейстера Саргылана Яковлева, оператор Роман Митиненко бэлэмнээтилэр. Андрей Никитич тус бэйэтинэн Владимир Тимофеевтыын сүүйүүлээх лотереяны оонньоттулар, көрдөөх, ылбаҕай тылларынан хас тахсар кэрэ аҥары хоһуйан, сүрдээх истиҥник ааста.
Лотереябыт бириистэрин нэһилиэкпит эр дьоно, Болугуртан төрүттээх урбаанньыттар, салайааччылар туруордулар. Ол курдук, Афанасьев Петр Иванович нэһилиэк иһигэр 10 рейс таксинан босхо таһарга сертификат, «Сахаспецтранс» ХЭТ үлэһитэ Окороков Трофим Константинович уу кутарга 10 босхо сертификат, урбаанньыт, таксист Новиков Виталий Владимирович Болугур — Дьокуускай хайысханан босхо айанныырга 2 билиэти, ону таһынан Аянитов Октябрь Валерьевич бэйэтин 2 оҥоһугун туруорда, Дьулус Васильев 2 полка, Колосов Михаил Михайлович 2 тыһ. солк. сертификат, Дьокуускай куорат «Уруу» ювелирнай маҕаһыын 7 устуука үрүҥ көмүс киэргэл, Амматааҕы «Махтал» маҕаһыын электрическэй сковородка, Амматааҕы «Бэрт» маҕаһыын 1000 уонна 500 солкуобайдаах сертификат, Покровка «Феникс» маҕаһыын «Тефаль» чайник, нэһилиэкпит эр дьоно 22 тыһынча солк. суумалаах араас дьиэҕэ — уокка туттулар олус бэрт бэлэхтэри туруордулар. Саамай сүрүн бирииһи — 1 прицеп оттук маһы Михайлов Лазерь Лазеревич, Егоров Максим Павлович туруордулар.
Долгутуулаах кэм тиийэн кэлэн, сүрүн бирииһи 10-с кылаас үөрэнээччитэ Петрова Сайаана сүүйэн дьонун олус үөртэ. Бу курдук тэрээһиммит сэргэхтик, саала иһэ толору киһи тоҕуоруһан олус үчүгэйдик ааста. Спонсордарбытыгар сүрдээх улахан махталбытын тиэрдэбит. Бу курдук түмсүүлээх буллахпытына барытын ситиһиэхпит, дьоммут-сэргэбит олоҕун киэргэтэ туруоҕуҥ. Нэһилиэкпит эр дьонугар наһаа үчүгэй, ис сүрэххититтэн истиҥ ырыалардаах, көрдөөх оонньуулаах, баай лотереялаах дьоро киэһэни бэлэхтээбиккитигэр долгуйан туран махтанабыт, үөрдүбүт, олус астынныбыт диэн ватсабынан нэһилиэкпит группатыгар истиҥ тыллар кэлэ тураллар.
Евдокия Платонова.