Болугур нэһилиэгэр Улуу Кыайыы 80 сылыгар аналлаах өрөспүүбүлүкэтээҕи «Бары бииргэ Кыайыыга» диэн девизтээх Кыайыы кыһыл знамятын эстафетатын көрсөр өрөгөйдөөх чааһын олохтоохтор өрө көтөҕүллэн көрүстүлэр.
Улуу Кыайыы Знамятын көрсө Болугур нэһилиэгин оҕотуттан ытык кырдьаҕаһыгар тиийэ бука бары бииргэ, сүһүөхпүтүгэр туран сүгүрүйэ көрүстүбүт. Бу Кыайыы былааҕын көрсө ыаллыы олорор Амма Наахара нэһилиэгин дэлэгээссийэтэ баһылык солбуйааччыта Сахаяна Михайлова салайан илдьэ кэллэ. Улуу Кыайыыбыт Знамятын Амма улууһун баһылыгын солбуйааччы Ньургуйаана Илларионова, «Юная армия» ыстаабын салайааччыта Петр Попов аҕалан туттардылар. Болугур нэһилиэгин баһылыга Андрей Петров, Амма Наахара баһылыгын солбуйааччыта Сахаяна Михайлова, бэтэрээннэр сэбиэттэрин бэрэссэдээтэллэрэ Надежда Кондакова, Марианна Чен, Е. Е. Пахомов аатынан Болугур орто оскуолатын оҕолор хамсааһыннарын лидера Снежана Елегяева бэлиэ күнүнэн эҕэрдэлэрин тириэртилэр.
Болугур орто оскуолатын «Хоһуун» байыаннай патриотическай хамсааһын иитиллээччилэрэ (сал. П. И. Шестаков) «Кыайыы знамятын» тутан саала устун хаамтылар. Бу үөрүүлээх тэрээһиҥҥэ кыраайы үөрэтээччи Тимофей Никифоров өр сыллаах үлэтин дьоҥҥо-сэргэҕэ быыстапкалаан көрдөрдө, кэпсээтэ. Знамяны көрсүү 8-с кылаас үөрэнээччитэ Глеб Потапов Макар Хара «Хорсуттар ырыалара» диэн хоһоонун дорҕоонноохтук ааҕыытынан түмүктэннэ. Хорсун хоодуот, эйэлээх олох иһин олохторун толук уурбут, кыайыыны уһансыбыт ытыктабыллаах дьоммутугар махтанабыт. Ким да умнуллубат! Туох да умнуллубат!
Евдокия ПЛАТОНОВА